Alappuzha | December 02, 2025
കായംകുളം പുല്ലുകുളങ്ങരയിൽ അഭിഭാഷകനായ മകൻ അച്ഛനെ കൊലപ്പെടുത്തിയത് അതിക്രൂരമായ രീതിയിൽ. നടരാജനെ മകൻ നവജിത്ത് 47 തവണ വെട്ടിയാണ് കൊലപ്പെടുത്തിയത്. മുഖവും തലയും വെട്ടി വികൃതമാക്കി. അതിമാരകമായ ലഹരിമരുന്ന് ഉപയോഗിച്ചാണ് പ്രതി കുറ്റകൃത്യം നടത്തിയതെന്ന് പൊലീസ് വ്യക്തമാക്കി.
ലഹരിയിൽ രക്ഷിതാക്കളെ തിരിച്ചറിഞ്ഞില്ല
30 വയസ്സുള്ള പ്രതി ലഹരിമരുന്ന് ഉപയോഗിച്ചതിന് ശേഷമാണ് ക്രൂരകൃത്യം ചെയ്തത്. അച്ഛനാണോ അമ്മയാണോ എന്ന് പോലും തനിക്ക് തിരിച്ചറിയാനായില്ലെന്ന് യുവാവ് പൊലീസിന് മൊഴി നൽകി.
പിതാവിന്റെ മുഖം വികൃതമാക്കി, കണ്ണ് വെട്ടി പുറത്തേക്ക് തള്ളിയ അവസ്ഥയിലാക്കി. കൈപ്പത്തി വെട്ടിമാറ്റിയിരുന്നു. ഗുരുതരമായി പരിക്കേറ്റ അമ്മ നിലവിൽ ചികിത്സയിലാണ്. അമ്മയുടെ വിരലുകളെല്ലാം അറുത്തുമാറ്റിയ നിലയിലായിരുന്നു.
ഭാര്യയെ പ്രസവത്തിനായി ആശുപത്രിയിൽ എത്തിക്കാനിരിക്കെ
ഭാര്യയെ പ്രസവത്തിനായി ആശുപത്രിയിൽ അഡ്മിറ്റ് ചെയ്യാനിരിക്കെയാണ് നവംബർ 30-ന് രാത്രി നവജിത്ത് അച്ഛനെ കൊന്നതും അമ്മയെ പരിക്കേൽപിച്ചതും. രാവിലെ മുതൽ നവജിത്ത് വീട്ടിലിരുന്ന് മദ്യപിക്കുകയായിരുന്നു. ഇടയ്ക്ക് ലഹരിമരുന്നും ഉപയോഗിച്ചു.
മാതാപിതാക്കൾ ഇത് ചോദ്യം ചെയ്തതാണ് പ്രകോപനത്തിന് ഇടയാക്കിയത്. ബഹളം കേട്ടെത്തിയ നാട്ടുകാർ വീടിന്റെ വാതിൽ ചവിട്ടിപ്പൊളിച്ചാണ് അകത്തേക്ക് കയറിയത്.
രണ്ട് ഡമ്മികളുണ്ടെന്ന് പറഞ്ഞു
അകത്ത് രണ്ട് ഡമ്മികൾ ഉണ്ടെന്നാണ് ചോരയിൽ കുളിച്ച് കയ്യിൽ കത്തിയുമായി നിൽക്കുകയായിരുന്ن നവജിത്ത് നാട്ടുകാരോട് പറഞ്ഞത്. പൊലീസ് എത്തിയതിന് ശേഷം പതിയെ വീടിന്റെ മുകൾനിലയിലേക്ക് പോയ നവജിത്തിനെ ബലപ്രയോഗത്തിലൂടെയാണ് കീഴടക്കാനായത്.
മാവേലിക്കര കോടതിയിൽ പ്രാക്ടീസ് ചെയ്യുന്ന നവജിത്തിന് രണ്ട് സഹോദരങ്ങളുമുണ്ട്. ലഹരിമരുന്ന് ഉപയോഗം മൂലമുണ്ടായ മാനസിക വൈകല്യം ഈ ക്രൂര കൊലപാതകത്തിന് കാരണമായതായി പ്രാഥമിക അന്വേഷണത്തിൽ കണ്ടെത്തിയിട്ടുണ്ട്.
