Kochi | December 12, 2025
പ്രമുഖ നടിക്കെതിരായ ആക്രമണ കേസിൽ ശിക്ഷാവിധി ഇന്ന് വൈകുന്നേരം 3.30ന് പ്രഖ്യാപിക്കും. എറണാകുളം പ്രിൻസിപ്പൽ സെഷൻസ് കോടതിയിൽ ശിക്ഷാവിധിയുടെ വാദം പൂർത്തിയായതിനെത്തുടർന്നാണ് ജഡ്ജി ഹണി എം വർഗീസ് ഈ തീരുമാനമെടുത്തത്. കോടതിയലക്ഷ്യ കേസുകൾ ഉൾപ്പെടെയുള്ള മറ്റ് കേസുകൾ 18-ാം തീയതിയിലേക്ക് മാറ്റി
പ്രതികളുടെ വാദവും കോടതിയുടെ നിലപാടും
കുറ്റക്കാരെന്ന് കണ്ടെത്തിയ ആറ് പ്രതികളെയും കോടതിയിൽ ഹാജരാക്കിയിരുന്നു. പ്രതികളിൽ പലരും ജഡ്ജിക്ക് മുന്നിൽ വൈകാരികമായി അപേക്ഷിക്കുകയും ശിക്ഷയിളവ് ആവശ്യപ്പെടുകയും ചെയ്തു. കൂട്ട ലൈംഗികാതിക്രമം ഉൾപ്പെടെയുള്ള കുറ്റങ്ങൾ തെളിയിക്കപ്പെട്ടതിനാൽ ശിക്ഷാവിധിയിൽ മാത്രം വാദം മതിയെന്ന് കോടതി വ്യക്തമാക്കി.
പ്രതികളുടെ അഭിഭാഷകർ കേസിലെ മറ്റ് വശങ്ങളിലേക്ക് വാദം കൊണ്ടുപോകാൻ ശ്രമിച്ചപ്പോൾ കോടതി അത് തടഞ്ഞു. കുറ്റം തെളിയിക്കപ്പെട്ടതാണെന്നും ശിക്ഷയുടെ കാര്യത്തിൽ എന്തെങ്കിലും അറിയിക്കാനുണ്ടെങ്കിൽ അത് മാത്രം മതിയെന്നും കോടതി വ്യക്തമാക്കി. എല്ലാ പ്രതികളുടെയും അഭിഭാഷകർ ശിക്ഷാകാലയളവ് കുറയ്ക്കണമെന്ന അഭ്യർഥന നടത്തി.
പ്രോസിക്യൂഷന്റെ നിലപാട്
എല്ലാ പ്രതികൾക്കും പരമാവധി ശിക്ഷ നൽകണമെന്ന് പ്രോസിക്യൂഷൻ ആവശ്യപ്പെട്ടു. ഗൂഢാലോചന തെളിഞ്ഞാൽ എല്ലാവർക്കും ഉത്തരവാദിത്തമുണ്ടെന്ന നിലപാടാണ് പ്രോസിക്യൂഷൻ സ്വീകരിച്ചത്. എന്നാൽ കുറ്റകൃത്യത്തിലെ പങ്കാളിത്തം അനുസരിച്ചല്ലേ ഓരോരുത്തർക്കും ശിക്ഷ വിധിക്കേണ്ടതെന്ന് കോടതി ചോദിച്ചു. എല്ലാ പ്രതികൾക്കും ഒരേപോലെ ശിക്ഷ നൽകണമെന്ന് പ്രോസിക്യൂഷൻ ആവർത്തിച്ചു.
കേസിന്റെ പശ്ചാത്തലം
2017 ഫെബ്രുവരി 17-ന് അങ്കമാലി അത്താണിക്ക് സമീപം നടിയുടെ വാഹനം തടഞ്ഞുനിർത്തി അതിക്രമിച്ച് കയറിയ സംഘം നടിയെ ഉപദ്രവിക്കുകയും ദൃശ്യങ്ങൾ പകർത്തുകയും ചെയ്തുവെന്നാണ് കേസ്.
എൻ.എസ്.സുനിൽ (പൾസർ സുനി), മാർട്ടിൻ ആന്റണി, ബി.മണികണ്ഠൻ, വി.പി.വിജീഷ്, എച്ച്.സലിം, പ്രദീപ് എന്നിവരാണ് കുറ്റക്കാരെന്ന് കണ്ടെത്തിയ പ്രതികൾ. പി.ഗോപാലകൃഷ്ണൻ (ദിലീപ്), ചാർലി തോമസ്, സനിൽ കുമാർ, ജി.ശരത് എന്നിവരെ കുറ്റവിമുക്തരാക്കിയിരുന്നു. നടൻ ദിലീപിനെതിരെ ഗൂഢാലോചന കുറ്റം തെളിയിക്കാൻ പ്രോസിക്യൂഷനു കഴിഞ്ഞില്ല. വിധിക്കെതിരെ അപ്പീൽ നൽകുമെന്ന് സർക്കാർ വ്യക്തമാക്കിയിട്ടുണ്ട്.
കോടതിയലക്ഷ്യ കേസുകളും മറ്റ് അപേക്ഷകളും
ദിലീപിന്റെ അഭിഭാഷകൻ കോടതിയലക്ഷ്യ കേസുമായി കോടതിയിൽ ഹാജരായി. മാധ്യമപ്രവർത്തകൻ നികേഷ് കുമാർ, അന്വേഷണ ഉദ്യോഗസ്ഥൻ ബൈജു പൗലോസ്, അന്തരിച്ച സംവിധായകൻ ബാലചന്ദ്രകുമാർ, ചില മാധ്യമപ്രവർത്തകർ എന്നിവർക്കെതിരെയാണ് കോടതിയലക്ഷ്യ കേസുകൾ. ഈ കേസുകൾ 18-ന് പരിഗണിക്കും.
പൾസർ സുനിയുടെ അമ്മയുടെ അപേക്ഷയും കോടതി പരിഗണിച്ചു. ഒരു ലക്ഷം രൂപ തന്റെ അക്കൗണ്ടിൽ ഉണ്ടായിരുന്നുവെന്നും അത് ഫ്രീസ് ചെയ്തിരിക്കുകയാണെന്നും വിട്ടുകിട്ടണമെന്നാണ് അമ്മ ആവശ്യപ്പെട്ടത്. ദിലീപിന്റെ നിർമ്മാണ കമ്പനിയിൽ നിന്ന് പൾസർ സുനിക്ക് ലഭിച്ച പണം അമ്മയുടെ അക്കൗണ്ടിലേക്ക് മാറ്റിയതാണ് ഫ്രീസ് ചെയ്യപ്പെട്ട തുക. ഈ അപേക്ഷയും 18-ാം തീയതിയിലേക്ക് മാറ്റി.
കോടതിയുടെ മുന്നറിയിപ്പ്
ജുഡീഷ്യൽ നടപടിക്രമങ്ങളെ മോശമായി ചിത്രീകരിക്കരുതെന്ന് പറഞ്ഞുകൊണ്ടാണ് കോടതി വാദം കേൾക്കൽ ആരംഭിച്ചത്. അഭിഭാഷകരുടെയും മാധ്യമപ്രവർത്തകരുടെയും ഭാഗത്തുനിന്ന് കോടതി നടപടികളെ തടസപ്പെടുത്തുന്നതോ മോശമായി ചിത്രീകരിക്കുന്നതോ ആയ പ്രവർത്തികൾ പാടില്ലെന്ന് ജഡ്ജി ഹണി എം വർഗീസ് കർശനമായി മുന്നറിയിപ്പ് നൽകി.
“അഭിപ്രായം പറയാൻ വരുന്നവർ പറഞ്ഞോളൂ. പക്ഷേ, വിധിന്യായം പൂർണമായും വായിച്ചിട്ടുവേണം അതു പറയാൻ,” എന്നും ജഡ്ജി പറഞ്ഞു. തന്റെ ഭൂതകാലവും ഭാവിയും അന്വേഷിച്ചുകൊള്ളൂ, പക്ഷേ കോടതി ക്രമങ്ങളെ മോശമായി ചിത്രീകരിക്കരുതെന്നും ജഡ്ജി വ്യക്തമാക്കി.
Highlights
Sentence in actress attack case to be announced at 3.30 PM today
Arguments on sentencing completed in Ernakulam Principal Sessions Court
All six convicts pleaded for leniency with emotional appeals
Prosecution demanded maximum punishment for all accused
Court insisted arguments should focus only on quantum of sentence
Contempt of court cases postponed to 18th
Pulsar Suni’s mother’s petition regarding frozen bank account also postponed
Judge warned against portraying judicial proceedings negatively
Court emphasized dignity of survivor and seriousness of offense
2017 assault case involving abduction and filming of actress
.
