തിരുവനന്തപുരം | ജനുവരി | 08, 2026
വർഷങ്ങളായി സിപിഐഎം സഹയാത്രികനും ചാനൽ ചർച്ചകളിലെ ഇടത് സാന്നിധ്യവുമായിരുന്ന റെജി ലൂക്കോസ് ബിജെപിയിൽ ചേർന്നു. തിരുവനന്തപുരത്ത് നടന്ന ചടങ്ങിൽ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ അദ്ദേഹത്തെ ഷാളണിയിച്ച് പാർട്ടിയിലേക്ക് സ്വീകരിച്ചു. ദ്രവിച്ച രാഷ്ട്രീയ ആശയങ്ങളുമായി മുന്നോട്ട് പോയാൽ കേരളം താമസിയാതെ ഒരു വൃദ്ധസദനമായി മാറുമെന്ന് റെജി ലൂക്കോസ് പ്രതികരിച്ചു.
ഇടതുപക്ഷത്തിനെതിരെ രൂക്ഷവിമർശനം
ഏകദേശം 35 വർഷത്തോളം ഇടതുപക്ഷ ചിന്താഗതിക്കൊപ്പം നിന്ന താൻ, നിലവിലെ ആശയപരമായ പാപ്പരത്തം തിരിച്ചറിഞ്ഞാണ് ബിജെപിയിലേക്ക് എത്തിയതെന്ന് അദ്ദേഹം വ്യക്തമാക്കി. “ബിജെപി ദേശീയ നേതൃത്വം മുന്നോട്ടുവെക്കുന്ന വികസന കാഴ്ചപ്പാടുകൾ എന്നെ അത്ഭുതപ്പെടുത്തി. കേരളത്തിൽ സിപിഐഎം ഇപ്പോൾ വർഗീയ വിഭജനത്തിനാണ് ശ്രമിക്കുന്നത്. ഒരു രാഷ്ട്രീയ യുദ്ധത്തിനല്ല, മറിച്ച് നാടിന്റെ മാറ്റത്തിനാണ് താൻ ആഗ്രഹിക്കുന്നത്,” റെജി ലൂക്കോസ് മാധ്യമങ്ങളോട് പറഞ്ഞു.
കഴിഞ്ഞ 13 വർഷമായി ടെലിവിഷൻ ചർച്ചകളിൽ ഇടതുപക്ഷത്തിന് വേണ്ടി സംസാരിച്ചിരുന്ന റെജി ലൂക്കോസ്, ഇനി മുതൽ തന്റെ വാക്കുകളും പ്രവർത്തികളും ബിജെപിക്ക് വേണ്ടിയായിരിക്കുമെന്ന് പ്രഖ്യാപിച്ചു. പാർട്ടിയുമായുള്ള എല്ലാ ബന്ധങ്ങളും പൂർണ്ണമായും ഉപേക്ഷിച്ചതായും അദ്ദേഹം കൂട്ടിച്ചേർത്തു. ബിജെപിയിലേക്ക് കടന്നുവരാൻ കുറച്ചുനാളായി ക്ഷണം ലഭിച്ചിരുന്നുവെന്നും ആശയപരമായ മാറ്റം ഉൾക്കൊണ്ടാണ് ഈ തീരുമാനമെന്നും അദ്ദേഹം വ്യക്തമാക്കി.
Content Highlights
CPIM fellow traveller and panelist Reji Lukose joins BJP.
BJP State President Rajeev Chandrasekhar welcomed him into the party.
Reji Lukose criticizes CPIM for pursuing outdated ideologies and communal division.
He warns that Kerala will become an “old age home” if it continues with current political trends.
Expresses admiration for BJP’s national development vision.
