തിരുവനന്തപുരം | 15, ജനുവരി | 2026
ശബരിമല സ്വർണ്ണക്കൊള്ള കേസുമായി ബന്ധപ്പെട്ട് തിരുവിതാംകൂർ ദേവസ്വം ബോർഡ് മുൻ പ്രസിഡന്റ് പി.എസ് പ്രശാന്തിനെ പ്രത്യേക അന്വേഷണ സംഘം (SIT) വീണ്ടും ചോദ്യം ചെയ്യുന്നു. രണ്ട് ദിവസത്തിനകം നോട്ടീസ് നൽകി അദ്ദേഹത്തെ വിളിച്ചുവരുത്താനാണ് അന്വേഷണ സംഘത്തിന്റെ തീരുമാനം. 2025-ൽ ശബരിമലയിലെ ദ്വാരപാലക ശില്പങ്ങളിലെ സ്വർണ്ണപ്പാളികൾ അറ്റകുറ്റപ്പണിക്കായി ചെന്നൈയിലെ സ്മാർട്ട് ക്രിയേഷൻസിലേക്ക് കൊണ്ടുപോയതുമായി ബന്ധപ്പെട്ടാണ് വീണ്ടും ചോദ്യം ചെയ്യൽ നടക്കുന്നത്.
നേരത്തെ പ്രശാന്തിനെ ചോദ്യം ചെയ്തപ്പോൾ, സ്റ്റേറ്റ്മെന്റ് നൽകൽ പൂർത്തിയായെന്നും ഇനി ഹാജരാകേണ്ടി വരില്ലെന്നുമാണ് അദ്ദേഹം മാധ്യമങ്ങളോട് പറഞ്ഞിരുന്നത്. എന്നാൽ, അറസ്റ്റിലായ പ്രതികളിൽ നിന്ന് ലഭിച്ച പുതിയ വിവരങ്ങളുടെ അടിസ്ഥാനത്തിൽ പ്രശാന്തിൽ നിന്ന് കൂടുതൽ വ്യക്തത തേടേണ്ടതുണ്ടെന്നാണ് എസ്ഐടി നിലപാട്.
അന്വേഷണത്തിന്റെ പ്രധാന കേന്ദ്രങ്ങൾ
സ്വർണ്ണപ്പാളി കടത്ത്: 40 വർഷത്തെ ഗ്യാരന്റിയിൽ 2019-ൽ സ്വർണ്ണം പൂശി സ്ഥാപിച്ച പാളികൾ, കേവലം ആറ് വർഷത്തിനുള്ളിൽ വീണ്ടും മങ്ങലേറ്റു എന്നാരോപിച്ച് 2025 സെപ്റ്റംബറിൽ ചെന്നൈയിലേക്ക് കൊണ്ടുപോയിരുന്നു. സ്പെഷ്യൽ കമ്മിഷണറെ പോലും അറിയിക്കാതെ നടന്ന ഈ നീക്കത്തിൽ അഴിമതിയുണ്ടെന്നാണ് റിപ്പോർട്ട്.
ഉണ്ണികൃഷ്ണൻ പോറ്റിയുടെ ഇടപെടൽ: സ്വർണ്ണപ്പാളികൾ അറ്റകുറ്റപ്പണിക്കായി കൊണ്ടുപോകുന്നതിന് മുൻകൈ എടുത്തത് കേസിലെ പ്രധാന പ്രതിയായ ഉണ്ണികൃഷ്ണൻ പോറ്റിയാണ്. പ്രതികളെ നേരിട്ട് അറിയില്ലെന്ന പ്രശാന്തിന്റെ മുൻ മൊഴി അന്വേഷണ സംഘം വിശദമായി പരിശോധിക്കും.
പിറകെ വരുന്നത് വമ്പ സ്രാവുകൾ: കേസിൽ ഇതിനോടകം 11 പേർ അറസ്റ്റിലായിട്ടുണ്ട്. മുൻ ദേവസ്വം ബോർഡ് അംഗം കെ.പി ശങ്കരദാസിനെ കഴിഞ്ഞ ദിവസം ആശുപത്രിയിലെത്തിയാണ് എസ്ഐടി അറസ്റ്റ് ചെയ്തത്. എ. പത്മകുമാർ ബോർഡ് പ്രസിഡന്റായിരുന്ന കാലത്തെ അംഗമായിരുന്നു ശങ്കരദാസ്.
ശബരിമലയിലെ സ്വർണ്ണവുമായി ബന്ധപ്പെട്ട ഇടപാടുകളിൽ ഉന്നത ഉദ്യോഗസ്ഥർക്കും രാഷ്ട്രീയ നേതാക്കൾക്കും പങ്കുണ്ടെന്ന ആരോപണം ശരിവെക്കുന്ന രീതിയിലാണ് അന്വേഷണം പുരോഗമിക്കുന്നത്. പി.എസ് പ്രശാന്തിനെ വീണ്ടും ചോദ്യം ചെയ്യുന്നതിലൂടെ കൂടുതൽ നിർണ്ണായക വിവരങ്ങൾ പുറത്തുവരുമെന്നാണ് മംഗളം ന്യൂസ് ഓൺലൈൻ വിലയിരുത്തുന്നത്.
Content Highlights
SIT to re-examine former Devaswom Board President P.S. Prashanth in the Sabarimala gold heist case. The probe focuses on the 2025 transfer of gold plates from Dvarapala sculptures to Chennai for alleged repairs without informing the Special Commissioner.
