കൊച്ചി I ഡിസംബർ 10, 2025
നടിയെ ആക്രമിച്ച കേസിലെ വിചാരണക്കോടതി വിധി ചോർന്നു എന്ന ഹൈക്കോടതി അഭിഭാഷക അസോസിയേഷൻ പ്രസിഡന്റ് അഡ്വ. യശ്വന്ത് ഷേണായിയുടെ ആരോപണം അസോസിയേഷൻ തള്ളി. അഡ്വ. യശ്വന്ത് ഷേണായി ചീഫ് ജസ്റ്റിസിന് അയച്ച കത്ത് എക്സിക്യൂട്ടിവ് കമ്മിറ്റിയുടെ അറിവോടെയല്ലെന്ന് അസോസിയേഷൻ പ്രസ്താവനയിലൂടെ വ്യക്തമാക്കി.
അസോസിയേഷൻ നിലപാട്
ജഡ്ജിമാർക്ക് ചോദ്യം ചെയ്യപ്പെടാനാകാത്ത വിശ്വാസ്യതയുണ്ടെന്നും അസോസിയേഷൻ എക്സിക്യൂട്ടീവ് കമ്മിറ്റി കൂട്ടിച്ചേർത്തു. പ്രസിഡന്റ് വ്യക്തിപരമായി അയച്ച കത്ത് അസോസിയേഷന്റെ പൊതു അഭിപ്രായമല്ല എന്ന സൂചനയാണ് പ്രസ്താവന നൽകുന്നത്.
യശ്വന്ത് ഷേണായിയുടെ പരാതി
കേസിൽ ഗൂഢാലോചനാക്കുറ്റം ആരോപിക്കപ്പെട്ട എട്ടാം പ്രതി ദിലീപിനെ കുറ്റവിമുക്തനാക്കിയ വിചാരണക്കോടതിയുടെ വിധിയുടെ ഉള്ളടക്കം വിധി പ്രഖ്യാപനത്തിന് മുമ്പ് ഊമക്കത്തായി ലഭിച്ചു എന്ന് ചൂണ്ടിക്കാട്ടിയാണ് അഡ്വ. യശ്വന്ത് ഷേണായി ഹൈക്കോടതി ചീഫ് ജസ്റ്റിസിന് കത്തയച്ചത്. ഈ ഊമക്കത്തിന്റെ പകർപ്പും അദ്ദേഹം പരാതിയോടൊപ്പം നൽകിയിരുന്നു.
ദിലീപ് കുറ്റവിമുക്തനാക്കപ്പെടുമെന്ന സന്ദേശം ഡിസംബർ രണ്ടിന് തനിക്ക് ലഭിച്ചുവെന്നാണ് യശ്വന്ത് ഷേണായിയുടെ പരാതി. ഡിസംബർ എട്ടിനാണ് കേസിൽ വിധി പ്രസ്താവം നടന്നത്. ഒന്നാം പ്രതി പൾസർ സുനി ഉൾപ്പെടെ ആറുപേരെ കുറ്റക്കാരായി പ്രസ്താവിക്കുന്ന വിധിയുടെ ഉള്ളടക്കം വിധിക്ക് മുമ്പേ പുറത്തായത് നീതിന്യായ വ്യവസ്ഥയുടെ രഹസ്യാത്മകതയും അഖണ്ഡതയും തകർക്കുന്നതാണെന്നും അദ്ദേഹം ചൂണ്ടിക്കാട്ടിയിരുന്നു.
ഊമക്കത്തിലെ ആരോപണങ്ങൾ
വിചാരണക്കോടതി ജഡ്ജി ഹണി എം വർഗീസ് സുഹൃത്തായ ഷേർളിയെക്കൊണ്ട് വിധി തയ്യാറാക്കി എന്നും, ദിലീപിന്റെ സുഹൃത്തും പ്രതിയുമായ ശരത്തിനെ കാണിച്ച് ‘കച്ചവടം ഉറപ്പിച്ചു’ എന്നും ഊമക്കത്തിൽ ആരോപിക്കുന്നു. കൂടാതെ, ഹൈക്കോടതിയിലെ മുതിർന്ന ജഡ്ജിമാരുടെ ‘അനുഗ്രഹത്തോടെയാണ്’ ജഡ്ജി ഇത്തരത്തിൽ പ്രവർത്തിക്കുന്നതെന്നും ആരോപണമുണ്ട്. ‘ഇന്ത്യൻ പൗരൻ’ എന്ന പേരിലെഴുതിയ ഈ ഊമക്കത്ത് സംബന്ധിച്ച് വിജിലൻസ് രജിസ്ട്രാറോ മറ്റൊരു ഏജൻസിയോ വിശദമായ അന്വേഷണം നടത്തണമെന്നും യശ്വന്ത് ഷേണായി ആവശ്യപ്പെട്ടിരുന്നു.
High Court Advocates Association rejects President Yashwanth Shenoy’s letter to CJ alleging leak of verdict; says the letter was without Executive Committee’s knowledge.
