തിരുവനന്തപുരം | 03, ജനുവരി | 2026
ശബരിമല സ്വർണക്കൊള്ള കേസിൽ സിപിഐഎം – കോൺഗ്രസ് പരസ്പരം സഹകരണം ഉണ്ടായെന്ന് ബിജെപി നേതാവ് എംടി രമേശ് വാർത്താസമ്മേളനത്തിൽ ആരോപിച്ചു. എസ്ഐടി അന്വേഷണത്തിൽ പരിമിതികൾ മുമ്പ് തന്നെ വ്യക്തമായതിനാൽ സംഭവം സിബിഐ അന്വേഷിക്കണമെന്നും അദ്ദേഹം ആവശ്യപ്പെട്ടു.
കേന്ദ്ര ഏജൻസിയുടെ അന്വേഷണം ആവശ്യപ്പെട്ട് ബിജെപി നിയമപരമായ നടപടികൾ സ്വീകരിക്കുമെന്നും വിശ്വാസികളെ ഉൾപ്പെടുത്തി സമരം നടത്തുമെന്നും എംടി രമേശ് വ്യക്തമാക്കി. സമരങ്ങൾക്കും പ്രക്ഷോഭങ്ങൾക്കും പുറമേ മകര സംക്രമ ദിനത്തിൽ ശബരിമല സംരക്ഷണ ദീപം വീടുകളിൽ തെളിയിക്കുമെന്നും അദ്ദേഹം പറഞ്ഞു.
ഈ മാസം 11ന് തിരുവനന്തപുരത്ത് എത്തുന്ന കേന്ദ്ര ആഭ്യന്തരമന്ത്രി അമിത് ഷാ സംസ്ഥാന നേതൃ യോഗത്തിൽ പങ്കെടുക്കുമെന്നും അദ്ദേഹം വ്യക്തമാക്കി. തദ്ദേശ തെരഞ്ഞെടുപ്പിൽ മത്സരിച്ച് ജയിച്ച ബിജെപി സ്ഥാനാർഥികൾക്ക് ചടങ്ങിൽ സ്വീകരണം നൽകും.
തദ്ദേശ തെരഞ്ഞെടുപ്പിൽ വോട്ടുശതമാനം കുറഞ്ഞിട്ടില്ലെന്നും 2020ൽ 14% ആയിരുന്നത് ഇത്തവണ 15% ആയി ഉയരുകയാണ് ഉണ്ടായതെന്നും എംടി രമേശ് പറഞ്ഞു. തെരഞ്ഞെടുപ്പിൽ ബിജെപിയെ തോൽപ്പിക്കാൻ യുഡിഎഫും എൽഡിഎഫും ബോധപൂർവം ശ്രമിച്ചെന്നും പഞ്ചായത്ത് പ്രസിഡന്റ് തിരഞ്ഞെടുപ്പിൽ പലയിടത്തും ഈ സഹകരണം ഉണ്ടായെന്നും എംടി രമേശ് പറഞ്ഞു. ബിജെപിയെ മാറ്റി നിർത്താൻ എൽഡിഎഫും യുഡിഎഫും ഒരു മുന്നണിയായി മാറിയെന്നും അദ്ദേഹം ആരോപിക്കുന്നു.
അതേസമയം എസ്എൻഡിപിയോഗം ജനറൽ സെക്രട്ടറി വെള്ളാപ്പള്ളി നടേശനെ എംടി രമേശ് പിന്തുണച്ചു. തീവ്രവാദി പരാമർശം അദ്ദേഹത്തിന്റെ ബോധ്യത്തിൽ പറഞ്ഞതാകുമെന്നും മാധ്യമ പ്രവർത്തകർക്ക് പ്രത്യേക പദവിയൊന്നുമില്ലല്ലോയെന്നും എംടി രമേശ് ചോദിച്ചു.
ശബരിമല സ്വർണക്കൊള്ള കേസിൽ സർക്കാർ ഗൗരവമായി പരിഗണിക്കുന്നില്ലെന്നും സിബിഐ അന്വേഷണം മാത്രമേ സത്യം പുറത്തുകൊണ്ടുവരൂ എന്നുമാണ് ബിജെപിയുടെ നിലപാട്. മകര സംക്രമ ദിനത്തിൽ ശബരിമല സംരക്ഷണ ദീപം തെളിയിക്കുന്നത് വിശ്വാസികളുടെ പ്രതിഷേധത്തിന്റെ പ്രതീകമാകുമെന്നും ബിജെപി പ്രതീക്ഷിക്കുന്നു.
Content Highlights
BJP demands CBI probe into Sabarimala gold heist case
MT Ramesh alleges CPM-Congress cooperation in case
Sabarimala protection lamp to be lit on Makaravilakku day
Home Minister Amit Shah to visit Thiruvananthapuram on January 11
BJP vote share increased from 14% to 15% in local body polls
LDF and UDF allegedly united to defeat BJP
MT Ramesh supports Vellappally Natesan’s controversial remarks
Legal measures to be taken for central agency probe
