തിരുവനന്തപുരം | ജനുവരി 2, 2026
തിരുവനന്തപുരം: റിപ്പോർട്ടർ ടി.വി മാധ്യമപ്രവർത്തകൻ റഹീസ് റഷീദിനെ ‘തീവ്രവാദി’ എന്ന് വിളിച്ച് അധിക്ഷേപിച്ച എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന്റെ നിലപാട് തള്ളിക്കളയുന്നതായി ഡി.വൈ.എഫ്.ഐ. വെള്ളാപ്പള്ളി നടേശൻ പ്രസ്താവന പിൻവലിച്ച് മാപ്പ് പറയണമെന്ന് ഡി.വൈ.എഫ്.ഐ തിരുവനന്തപുരം ജില്ലാ സെക്രട്ടറി ഷിജു ഖാൻ പത്താംകല്ല് ആവശ്യപ്പെട്ടു. ഫേസ്ബുക്ക് കുറിപ്പിലൂടെയാണ് അദ്ദേഹം സംഘടനയുടെ പ്രതിഷേധം രേഖപ്പെടുത്തിയത്.
https://www.facebook.com/share/p/18Bhvwg4Qm/
വാർത്താസമ്മേളനത്തിനിടെ അധിക്ഷേപം
കഴിഞ്ഞ ദിവസം മാധ്യമപ്രവർത്തകന്റെ മൈക്ക് തട്ടിമാറ്റിയതുമായി ബന്ധപ്പെട്ട വിവാദങ്ങൾ വിശദീകരിക്കാൻ വിളിച്ചുചേർത്ത വാർത്താസമ്മേളനത്തിലായിരുന്നു വെള്ളാപ്പള്ളി വീണ്ടും അധിക്ഷേപം തുടർന്നത്. റഹീസ് റഷീദ് മുസ്ലീങ്ങളുടെ വക്താവാണെന്നും ഈരാറ്റുപേട്ടക്കാരനായ ഇയാൾ തീവ്രവാദിയാണെന്നും വെള്ളാപ്പള്ളി ആരോപിച്ചു. “അയാൾക്ക് എന്റെ അപ്പൂപ്പനാകാനുള്ള പ്രായമില്ലേ? പെരുമാറ്റത്തിൽ മര്യാദ കാണിക്കേണ്ടേ?” എന്നും വെള്ളാപ്പള്ളി ചോദിച്ചു. റഹീസിനെ ആരോ തന്നെ വേട്ടയാടാൻ പറഞ്ഞയച്ചതാണെന്നും അദ്ദേഹം കുറ്റപ്പെടുത്തി.
മാധ്യമപ്രവർത്തകരുടെ ചോദ്യവും വെള്ളാപ്പള്ളിയുടെ വെല്ലുവിളിയും
വാർത്താസമ്മേളനത്തിനിടെ വെള്ളാപ്പള്ളിയുടെ ‘തീവ്രവാദി’ പരാമർശത്തെ മറ്റ് മാധ്യമപ്രവർത്തകർ ചോദ്യം ചെയ്തു. റഹീസിന് തീവ്രവാദ ബന്ധമുണ്ടോ എന്ന ചോദ്യത്തിന് ‘ഉണ്ട്’ എന്നായിരുന്നു വെള്ളാപ്പള്ളിയുടെ മറുപടി. തന്റെ അനുഭവത്തിൽ നിന്നാണ് ഇത് പറയുന്നതെന്നും തന്നെ ചോദ്യം ചെയ്യേണ്ടെന്നും അദ്ദേഹം ആഞ്ഞടിച്ചു. ചോദ്യം ചോദിച്ച മറ്റൊരു മാധ്യമപ്രവർത്തകനോട് “കൂടുതൽ കസറേണ്ട, മൈക്ക് വലിച്ചെറിയണോ?” എന്ന് ചോദിച്ച് വെള്ളാപ്പള്ളി വീണ്ടും പ്രകോപിതനായി.
റിപ്പോർട്ടർ ടി.വിക്കെതിരെ രൂക്ഷവിമർശനം
റിപ്പോർട്ടർ ടി.വി തന്നെ വേട്ടയാടുകയാണെന്നും മലപ്പുറത്ത് എസ്.എൻ.ഡി.പിക്ക് സ്കൂളും കോളേജും ഇല്ലെന്ന് പറഞ്ഞതിലാണോ ഇത്ര വിഷമമെന്നും വെള്ളാപ്പള്ളി ചോദിച്ചു. റിപ്പോർട്ടർ ടി.വിക്ക് പിന്നിൽ മറ്റാരോ പ്രവർത്തിക്കുന്നുണ്ടെന്നും അദ്ദേഹം ആരോപിച്ചു. എന്നാൽ, പേരിന്റെയും സ്ഥലത്തിന്റെയും പേരിൽ ഒരു മാധ്യമപ്രവർത്തകനെ പരസ്യമായി അധിക്ഷേപിച്ച വെള്ളാപ്പള്ളിയുടെ നടപടിക്കെതിരെ സോഷ്യൽ മീഡിയയിലടക്കം വലിയ പ്രതിഷേധമാണ് ഉയരുന്നത്.
Content Highlight: DYFI Thiruvananthapuram District Secretary Shiju Khan demanded an apology from SNDP General Secretary Vellappally Natesan for calling Reporter TV journalist Rahees Rasheed a ‘terrorist.’ Vellappally faced heat during a press conference where he repeated his allegations and challenged other journalists who questioned his communal remarks.
