കോഴിക്കോട് I ഡിസംബർ 30, 2025
കോഴിക്കോട്: വിനോദസഞ്ചാര കേന്ദ്രമായ ബാലുശ്ശേരി കരിയാത്തുംപാറയിൽ പുഴയിൽ മുങ്ങി ഒന്നാം ക്ലാസുകാരി മരിച്ചു. ഫറോക്ക് ചുങ്കം കെ.ടി. അഹമ്മദിന്റെയും നസീമയുടെയും മകൾ അബ്റാറ (6) ആണ് മരിച്ചത്. ഞായറാഴ്ച വൈകീട്ട് 3.30-ഓടെയാണ് നാടിനെ നടുക്കിയ അപകടമുണ്ടായത്.
ബന്ധുക്കൾക്കൊപ്പം കരിയാത്തുംപാറയിൽ വിനോദസഞ്ചാരത്തിനെത്തിയതായിരുന്നു അബ്റാറ. പുഴയുടെ വശങ്ങളിൽ കളിക്കുന്നതിനിടെ കുട്ടി വെള്ളത്തിൽ വീഴുകയായിരുന്നു. മൃതദേഹം വെള്ളത്തിൽ പൊങ്ങിക്കിടക്കുന്നത് കൂടെയുണ്ടായിരുന്ന മറ്റ് കുട്ടികളാണ് ആദ്യം കണ്ടത്. ഉടൻതന്നെ കുട്ടിയെ കരയ്ക്കെത്തിച്ച് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ഫറോക്ക് ചുങ്കം സ്വദേശിയായ കുട്ടിയുടെ വിയോഗം നാടിനെ ഒന്നടങ്കം ദുഃഖത്തിലാഴ്ത്തി. മൃതദേഹം പോസ്റ്റ്മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുകൊടുത്തു. വിനോദസഞ്ചാര കേന്ദ്രങ്ങളിൽ സന്ദർശകർ പുഴയിലിറങ്ങുമ്പോൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.
Content Highlight: A six-year-old girl, Abrara, from Faroke Chungam, drowned in the river at Kariyathumpara tourist spot in Kozhikode while visiting with her relatives.
