തിരുവനന്തപുരം | 28, ഡിസംബർ | 2025
സൗഹൃദം വെച്ചാണ് കൗൺസിലർ ആർ ശ്രീലേഖ എംഎൽഎ പ്രശാന്തിന്റെ ഓഫീസ് ഒഴിഞ്ഞുതരാൻ ആവശ്യപ്പെട്ടതെന്ന് തിരുവനന്തപുരം മേയർ വി വി രാജേഷ്. ശ്രീലേഖയും പ്രശാന്തും തമ്മിൽ വർഷങ്ങളായുള്ള ബന്ധമുണ്ടെന്നും രാഷ്ട്രീയവൽക്കരിക്കേണ്ട ആവശ്യമില്ലെന്നും വി വി രാജേഷ് പറഞ്ഞു. സംഭവത്തിന് ശേഷം ശ്രീലേഖ വിളിച്ച് സംസാരിച്ചുവെന്നും വി വി രാജേഷ് വ്യക്തമാക്കി.
വ്യക്തിബന്ധം വെച്ചുള്ള ആവശ്യം
“എന്റെ ഓഫീസിൽ സൗകര്യം കുറവാണെന്നാണ് ശ്രീലേഖ പറഞ്ഞത്. ബിന്ദു കൗൺസിലർ ആണ് എംഎൽഎക്ക് ഓഫീസ് ഒഴിഞ്ഞുകൊടുത്തത്. വ്യക്തിബന്ധം നോക്കിയാണ് ശ്രീലേഖ ചോദിച്ചത്. അതിനുശേഷം ശ്രീലേഖ എന്നെ വിളിച്ച് സംസാരിച്ചു. എല്ലാ കാര്യങ്ങളും പാർട്ടി അറിഞ്ഞു ചെയ്യണമെന്നില്ലല്ലോ. അവരുടെ വ്യക്തി ബന്ധം വച്ചാണ് സാധിക്കുമോ എന്ന് ചോദിച്ചത്. മാറാൻ എന്തെങ്കിലും സാധ്യതയുണ്ടോ എന്നാണ് ചോദിച്ചത്,” വി വി രാജേഷ് പറഞ്ഞു.
മേയറായിരുന്നെങ്കിൽ ഓഫീസ് കിട്ടിയേനെ എന്ന് പറഞ്ഞു എന്നതിൽ വസ്തുതയില്ലെന്നും വി വി രാജേഷ് വ്യക്തമാക്കി. വിവാദം ആളിക്കത്തിക്കേണ്ട ആവശ്യമില്ലെന്നും മേയർ കൂട്ടിച്ചേർത്തു.
വാടക കെട്ടിടങ്ങളുടെ പരിശോധന
വളരെ ചെറിയ തുകയ്ക്കാണ് കെട്ടിടം വാടകയ്ക്ക് നൽകിയിരിക്കുന്നതെന്ന് വി വി രാജേഷ് പറഞ്ഞു. “കോർപ്പറേഷൻ വാടകയ്ക്ക് നൽകിയ കെട്ടിടങ്ങളുടെ റേറ്റ് പരിശോധിക്കണം. വിശദമായ അന്വേഷണം നടത്തുമെന്നും നഗരസഭാ വാഹനങ്ങളുടെയും കെട്ടിടങ്ങളുടെയും കാര്യത്തിൽ പരിശോധന ഉണ്ടാകും,” മേയർ അറിയിച്ചു.
“കോർപ്പറേഷൻ വാടകയ്ക്ക് നൽകിയ കെട്ടിടങ്ങളുടെ റേറ്റ് പരിശോധിക്കണം. കിട്ടേണ്ട ന്യായമായുള്ള വാടക കിട്ടുന്നുണ്ടോ എന്ന് പരിശോധിക്കണം. ഇതിനെക്കുറിച്ച് അടിയന്തരമായി അന്വേഷണം നടത്തും. കണ്ണായ ഭാഗത്തുള്ള കെട്ടിടങ്ങൾക്ക് മതിയായ വാടക കിട്ടുന്നുണ്ടോ എന്നത് അന്വേഷിക്കും,” മേയർ വ്യക്തമാക്കി.
മേയർ പദവിയെച്ചൊല്ലിയുള്ള വിവാദങ്ങൾക്കിടയിൽ ശ്രീലേഖയും പാർട്ടി നേതൃത്വവും തമ്മിലുണ്ടായ അഭിപ്രായവ്യത്യാസങ്ങളുടെ പശ്ചാത്തലത്തിലാണ് ഓഫീസ് വിഷയം പുറത്തുവന്നത്. എന്നാൽ ഇത് വ്യക്തിപരമായ കാര്യമാണെന്നും രാഷ്ട്രീയവൽക്കരിക്കേണ്ടതില്ലെന്നുമാണ് മേയർ വി വി രാജേഷിന്റെ നിലപാട്.
Content Highlights: VV Rajesh says Sreelekha spoke to Prasanth due to personal relationship, no need to politicize, party need not know everything, investigation into corporation rental buildings announced, mayor office controversy explained, years-long friendship between Sreelekha and Prasanth mentioned
