Kolkata | December 03, 2025
കൊടുംതണുപ്പിൽ ആരോ ഉപേക്ഷിച്ചുപോയ ചോരക്കുഞ്ഞിന് സംരക്ഷണം തീർത്ത് തെരുവുനായ്ക്കൾ. പശ്ചിമ ബംഗാളിലെ നാദിയ ജില്ലയിലാണ് ഹൃദയസ്പർശിയായ സംഭവം.
റെയിൽവേ കോളനിയിൽ കണ്ടെത്തി
റെയിൽവേ തൊഴിലാളികളുടെ കോളനിയിലെ ബാത്ത്റൂമിന് പുറത്ത് തണുത്തുറഞ്ഞ നിലത്താണ് കുഞ്ഞിനെ ഉപേക്ഷിച്ച നിലയിൽ കണ്ടെത്തിയത്. ജനിച്ച് ഏതാനും മണിക്കൂറുകൾ മാത്രം പ്രായമുള്ള കുഞ്ഞിന്റെ ശരീരത്തിൽ രക്തത്തിന്റെ പാടുകൾ ഉണ്ടായിരുന്നു. ഒരു കുറിപ്പോ കുഞ്ഞിനെ പുതയ്ക്കാൻ പുതപ്പോ പോലും സമീപത്തുണ്ടായിരുന്നില്ല.
രാത്രി മുഴുവൻ നായ്ക്കളുടെ സംരക്ഷണം
രാത്രി മുഴുവൻ കുഞ്ഞിനെ സംരക്ഷിച്ചത് തെരുവുനായ്ക്കളാണ്. നായ്ക്കൾ കുരച്ചില്ല, കുഞ്ഞിനെ തൊട്ടില്ല. കുഞ്ഞിന് സംരക്ഷണവലയം തീർത്തുക മാത്രമാണ് ചെയ്തത്. രാത്രി മുഴുവൻ ആരും കുഞ്ഞിന് അരികിലേക്ക് വരാൻ നായ്ക്കൾ അനുവദിച്ചില്ലെന്ന് പ്രദേശവാസികൾ പറയുന്നു.
പകൽ വെളിച്ചം വരുന്നത് വരെ നായ്ക്കൾ കുഞ്ഞിന് ചുറ്റും കാവൽ നിന്നു. കുഞ്ഞിന്റെ കരച്ചിൽ കേട്ട് രാവിലെ പ്രദേശവാസികൾ എത്തിയപ്പോൾ കണ്ട കാഴ്ച തെരുവുനായ്ക്കൾ കാവൽക്കാരായി കുഞ്ഞിന് ചുറ്റും നിൽക്കുന്നതായിരുന്നു.
പ്രദേശവാസികളുടെ സഹായം
ഉടൻ തന്നെ സമീപവാസിയായ സ്ത്രീ എത്തി കുഞ്ഞിനെ എടുത്തു. പ്രദേശവാസികൾ ചേർന്ന് മഹേഷ്ഗഞ്ച് ആശുപത്രിയിലേക്കും തുടർന്ന് കൃഷ്ണനഗർ സദർ ആശുപത്രിയിലേക്കും കൊണ്ടുപോയി.
ആരോഗ്യപരിശോധന
കുട്ടിക്ക് മറ്റ് ആരോഗ്യപ്രശ്നങ്ങളോ പരിക്കോ ഇല്ലെന്നും ശരീരത്തിലുണ്ടായിരുന്ന ചോരക്കറ ജനിച്ചയുടൻ ഉപേക്ഷിച്ചത് മൂലമുണ്ടായതാണെന്നും ഡോക്ടർമാർ വ്യക്തമാക്കി.
പൊലീസ് അന്വേഷണം
പ്രദേശത്ത് തന്നെയുള്ള ആരെങ്കിലും കുഞ്ഞിനെ ഉപേക്ഷിച്ചതാകാമെന്നാണ് പൊലീസ് പ്രാഥമിക നിഗമനം. സംഭവത്തിൽ നബദ്വീപ് പൊലീസും ശിശുക്ഷേമ സമിതിയും അന്വേഷണം ആരംഭിച്ചു.
തെരുവുനായ്ക്കളുടെ സഹജമായ മാതൃസഹജാവബോധവും കരുണയും കുഞ്ഞിന്റെ ജീവൻ രക്ഷിച്ചു എന്നത് ശ്രദ്ധേയമാണ്. കുട്ടിയെ ഉപേക്ഷിച്ചവരെ കണ്ടെത്താനുള്ള ശ്രമങ്ങൾ തുടരുകയാണ്.
