Mumbai | November 30, 2025
70 വയസ്സുള്ള പ്രമുഖ നടൻ അനുപം ഖേർ തന്റെ സ്കൂൾ കാലഘട്ടത്തിലെ കഞ്ചാവ് വലിച്ച അനുഭവം പങ്കുവച്ചു. കഞ്ചാവ് വലിച്ചതിന് ശേഷം എട്ട് മണിക്കൂർ തുടർച്ചയായി ചിരിച്ചുകൊണ്ടിരുന്നുവെന്നും വട്ടായതുപോലെ തോന്നിയെന്നും നടൻ വെളിപ്പെടുത്തി.
‘അൺഫിൽട്ടേഡ് വിത്ത് സാംദിഷ്’ എന്ന പോഡ്കാസ്റ്റിൽ സംസാരിക്കവെയാണ് അനുപം ഖേർ ഈ അനുഭവങ്ങൾ പങ്കുവച്ചത്. പിന്നീട് ഒരിക്കലും ലഹരി വസ്തുക്കൾ കൈകൊണ്ട് തൊട്ടിട്ടില്ലെന്നും അദ്ദേഹം ഊന്നിപ്പറഞ്ഞു.
വിമാനം പൊട്ടായി മാറുന്നത് കണ്ടു
“രണ്ട് പുകയെടുത്തതായി തോന്നുന്നു. എന്നിട്ട് ഞാൻ ആകാശത്തേക്ക് നോക്കിയിരുന്നു. ആ സമയം എയർപോർട്ടിൽ നിന്ന് ഒരു വിമാനം ടേക്ക് ഓഫ് ആയി. ഞാൻ അതും നോക്കിയിരുന്നു. അത് ആകാശത്ത് ഒരു കുഞ്ഞ് പൊട്ടായി മാറുന്നത് വരെ നോക്കിയിരുന്നു. മിക്കവാറും വിമാനം എയർപോർട്ടിൽ ലാൻഡ് ചെയ്യുന്നത് വരെ ആകാശത്തേക്ക് നോക്കിയിരുന്നുണ്ടാകും” എന്ന് അനുപം ഖേർ വിവരിച്ചു.
“എനിക്ക് വട്ടായതുപോലെയായിരുന്നു. അതേ ദിവസം കാറിൽ കയറി ഇരുന്നപ്പോൾ റോഡ് ഓടുന്നതുപോലെ തോന്നി” എന്നും അദ്ദേഹം കൂട്ടിച്ചേർത്തു.
എട്ട് മണിക്കൂർ തുടർച്ചയായി ചിരിച്ചു
കഞ്ചാവടിച്ച സഹപാഠികളും തന്നോടൊപ്പം ഹോസ്റ്റലിന്റെ ടെറസിൽ നിൽക്കുന്നുണ്ടായിരുന്നുവെന്നും അനുപം ഖേർ വെളിപ്പെടുത്തി. “സൈന്യം വരുന്നു എന്ന് അവർ വാർഡനോട് പറഞ്ഞു. അക്ഷരാർത്ഥത്തിൽ എട്ട് മണിക്കൂറോളം തുടർച്ചയായി പൊട്ടിച്ചിരിക്കുകയായിരുന്നു ഞാൻ” എന്ന് അദ്ദേഹം പറഞ്ഞു.
“ചിരിച്ച് ചിരിച്ച് മരിച്ചുപോകുമെന്ന് തോന്നി. എന്നെ രക്ഷിക്കൂ എന്ന് ഞാൻ അവരോട് അപേക്ഷിച്ചു. കഞ്ചാവും ഭാംഗും ഇനി കൈകൊണ്ട് തൊടില്ലെന്ന് അന്ന് പ്രതിജ്ഞയെടുത്തു” എന്ന് അനുപം ഖേർ വ്യക്തമാക്കി.
ലഹരിവസ്തുക്കളിൽ നിന്ന് അകന്നു
ആ അനുഭവത്തിന് ശേഷം ഒരിക്കലും ലഹരിവസ്തുക്കളിലേക്ക് തിരിഞ്ഞില്ലെന്നും ജീവിതത്തിൽ അത്തരം കാര്യങ്ങൾ ഒഴിവാക്കിയെന്നും പ്രമുഖ നടൻ അനുപം ഖേർ പോഡ്കാസ്റ്റിൽ പങ്കുവച്ചു. സ്കൂൾ കാലത്തെ ഈ സംഭവം തന്റെ ജീവിതത്തിൽ ഒരു പാഠമായി മാറിയെന്നാണ് അദ്ദേഹം സൂചിപ്പിക്കുന്നത്
