Thiruvananthapuram | December 8, 2025
തിരുവനന്തപുരം: തദ്ദേശ തെരഞ്ഞെടുപ്പില് തിരുവനന്തപുരം നഗരസഭയില് ബിജെപി മൂന്നാം സ്ഥാനത്തേക്ക് പിന്തള്ളപ്പെടുമെന്ന് മുതിര്ന്ന കോണ്ഗ്രസ് നേതാവ് കെ. മുരളീധരന് എം.പി. കോണ്ഗ്രസിന് തലസ്ഥാന നഗരസഭയില് 55-ഓളം സീറ്റുകളില് വിജയപ്രതീക്ഷയുണ്ടെന്നും, ഭരണകക്ഷിയായ സിപിഐഎമ്മിന് നഗരസഭയില് പകുതി സീറ്റ് പോലും നേടാൻ കഴിയില്ലെന്നും അദ്ദേഹം പ്രസ്താവിച്ചു.
രാഹുല് മാങ്കൂട്ടത്തില് വിഷയവും തെരഞ്ഞെടുപ്പും
യുവ നേതാവ് രാഹുൽ മാങ്കൂട്ടത്തിലിനെതിരെ ഉയർന്ന വിഷയങ്ങളെക്കുറിച്ചുള്ള ചോദ്യത്തിന് മറുപടി നൽകവെ, രാഹുൽ മാങ്കൂട്ടത്തിലിനെ കോൺഗ്രസിൽ നിന്നും പുറത്താക്കിക്കഴിഞ്ഞെന്നും അതിനാൽ ആ വിഷയം വരാനിരിക്കുന്ന തദ്ദേശ തെരഞ്ഞെടുപ്പിനെ യാതൊരു കാരണവശാലും ബാധിക്കില്ലെന്നും മുരളീധരൻ വ്യക്തമാക്കി.
തെരഞ്ഞെടുപ്പ് ഒരുക്കങ്ങളും കമ്മീഷൻ നിർദ്ദേശങ്ങളും
അതേസമയം, തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ ആദ്യഘട്ട വോട്ടെടുപ്പ് നാളെ (ഡിസംബര് 9, ചൊവ്വാഴ്ച) നടക്കും. നാളെ രാവിലെ ഏഴുമണി മുതല് വൈകീട്ട് ആറുമണിവരെയാണ് വോട്ടെടുപ്പ്. രാവിലെ ആറ് മണിക്ക് മോക്ക് പോള് ആരംഭിക്കും. രണ്ടാംഘട്ട വോട്ടെടുപ്പ് ഡിസംബര് 11-ന് നടക്കും. വോട്ടെണ്ണല് ഡിസംബര് 13-നാണ് നിശ്ചയിച്ചിരിക്കുന്നത്.
പോളിംഗ് സ്റ്റേഷനുകളിൽ കുടിവെള്ളം, വിശ്രമസ്ഥലം, റാമ്പ്, ക്യൂ സൗകര്യം തുടങ്ങിയ അടിസ്ഥാന സൗകര്യങ്ങളെല്ലാം ഒരുക്കിയിട്ടുണ്ട്. പ്രായമായവർ, ഭിന്നശേഷിക്കാർ, മറ്റ് ശാരീരിക ബുദ്ധിമുട്ടുകൾ ഉള്ളവർ എന്നിവർക്ക് ക്യൂവിൽ നിൽക്കാതെ വോട്ട് രേഖപ്പെടുത്തുന്നതിന് പ്രത്യേക സൗകര്യവും ഏർപ്പെടുത്തിയിട്ടുണ്ട്.
മാതൃകാ പെരുമാറ്റച്ചട്ട ലംഘനം, കള്ളവോട്ട്, ആൾമാറാട്ടം, പോളിംഗ് ബൂത്തിൽ അതിക്രമം, തെരഞ്ഞെടുപ്പ് ഉദ്യോഗസ്ഥരെ കയ്യേറ്റം ചെയ്യൽ തുടങ്ങിയ കുറ്റകൃത്യങ്ങൾ ചെയ്യുന്നവർക്കെതിരെ കര്ശന നടപടി സ്വീകരിക്കുമെന്നും, വോട്ടെടുപ്പ്, വോട്ടെണ്ണൽ എന്നിവ തടസ്സപ്പെടുത്തുന്നവർക്കെതിരെ ശക്തമായ നിയമനടപടിയുണ്ടാകുമെന്നും സംസ്ഥാന തെരഞ്ഞെടുപ്പ് കമ്മീഷൻ മുന്നറിയിപ്പ് നൽകി.
Highlight
Thiruvananthapuram Corporation Polls: K. Muraleedharan predicts BJP will be third, CPIM will not get even half seats; dismisses Rahul Mankuttathil issue.
