കണ്ണൂര് 12 | 08 | 2026
സ്വന്തം ലേഖകൻ | മംഗളം ഓൺലൈൻ
ജീവിതത്തിന്റെ സാധാരണ വഴിയിലൂടെ സഞ്ചരിച്ചിരുന്ന ഒരു സാധാരണക്കാരന് മേല് നിയമപരമായ അശ്രദ്ധയും സാങ്കേതിക കുരുക്കുകളും എങ്ങനെയാണ് ഇരുട്ടടിയായി മാറുന്നത് എന്നതിന്റെ വ്യക്തമായ ഉദാഹരണമാണ് കണ്ണൂര് സ്വദേശിയായ ഷിജുവിന്റെ അനുഭവം. ഫിനാന്സ് കമ്പനിക്ക് തിരികെ നല്കിയതോ അല്ലെങ്കില് ജപ്തി ചെയ്യപ്പെട്ടതോ ആയ വാഹനങ്ങളുടെ ആര്.സി ബുക്ക് സ്വന്തം പേരില് തന്നെ നിലനിര്ത്തുന്നവര്ക്ക് കനത്ത മുന്നറിയിപ്പാണ് ഈ നിയമപോരാട്ടം.
സംഭവത്തിന്റെ തുടക്കം 2019 ഡിസംബര് 24-നാണ്. ക്രിസ്മസ് തലേന്ന് കണ്ണൂര് പയ്യാവൂര് പോലീസ് സ്റ്റേഷന് മുന്നില് വെച്ചാണ് പയ്യാവൂര് വഞ്ചിയം സ്വദേശിയായ ഷിജു പി.യുടെ പേരിലുള്ള KL-41C-3520 എന്ന ലോറി ചോരമണ്ഡലം ഇന്വെസ്റ്റ്മെന്റ് ആന്ഡ് ഫിനാന്സ് കമ്പനി പോലീസ് സാന്നിധ്യത്തില് പിടിച്ചെടുക്കുന്നത്. ലോറി തിരിച്ചേൽപ്പിച്ചതോടെ ഫിനാന്സ് ബാധ്യതകളില് നിന്നും അതിന്റെ പൂര്ണ്ണ ഉത്തരവാദിത്തങ്ങളില് നിന്നും താന് മോചിതനായി എന്ന ആശ്വാസത്തിലായിരുന്നു ഷിജു.
- എന്നാല് യഥാര്ത്ഥ പ്രശ്നങ്ങള് ആരംഭിക്കുന്നത് അതിനുശേഷമാണ്. പിടിച്ചെടുത്ത വാഹനം 2020 ജനുവരി 21-ഓടെ ഫിനാന്സ് കമ്പനി മറ്റ് വ്യക്തികള്ക്ക് കൈമാറുകയോ വില്ക്കുകയോ ചെയ്തു. എന്നിരുന്നാലും, മോട്ടോര് വാഹന വകുപ്പിന്റെ ഔദ്യോഗിക രേഖകളിലും ആര്.സി ബുക്കിലും വാഹനത്തിന്റെ ഉടമസ്ഥാവകാശം ഷിജുവിന്റെ പേരില് തന്നെ തുടരുകയായിരുന്നു. ഇതിനിടയില് 2020 നവംബര് 12-ന് കാസര്കോട് അതിഞ്ഞാലില് വെച്ച് ഈ ലോറി ഒരു അപകടത്തില്പ്പെടുകയും സുനില് കുമാര് എന്നയാള്ക്ക് ഗുരുതരമായി പരിക്കേല്ക്കുകയും ചെയ്തു. ഫിനാന്സ് കമ്പനി വാഹനം കൈമാറിയിരുന്നെങ്കിലും, അപകടം നടക്കുമ്പോള് ആ ലോറിക്ക് സാധുവായ ഇന്ഷുറന്സ് പരിരക്ഷ ഉണ്ടായിരുന്നില്ല എന്നത് സ്ഥിതി കൂടുതല് ഗുരുതരമാക്കി.
ഈ സംഭവവികാസങ്ങളെക്കുറിച്ചോ തുടര്ന്നുള്ള കോടതി നടപടികളെക്കുറിച്ചോ ഷിജു യാതൊരു വിവരവും അറിഞ്ഞിരുന്നില്ല. പരിക്കേറ്റ സുനില് കുമാര് നഷ്ടപരിഹാരത്തിനായി കാസര്കോട് മോട്ടോര് ആക്സിഡന്റ് ക്ലെയിംസ് ട്രിബ്യൂണലിനെ (MACT) സമീപിച്ചെങ്കിലും, ഷിജുവിന് ഔദ്യോഗിക നോട്ടീസുകളോ അറിയിപ്പുകളോ ലഭിച്ചിരുന്നില്ല. അതിനാല് അദ്ദേഹത്തിന് കോടതിയില് ഹാജരാകാനും തന്റെ ഭാഗം വ്യക്തമാക്കാനും സാധിച്ചില്ല. ഒടുവില് 2023 ഡിസംബര് 1-ന്, വാഹനത്തിന്റെ ഇന്ഷുറന്സ് പരിരക്ഷ ഇല്ലാത്തതും ആര്.സി ബുക്കില് ഇപ്പോഴും ഷിജു ഉടമയായി തുടരുന്നതും ചൂണ്ടിക്കാട്ടി പരിക്കേറ്റയാള്ക്ക് 4,52,027 രൂപ നഷ്ടപരിഹാരം നല്കാന് ട്രിബ്യൂണല് ഉത്തരവിട്ടു.
- വര്ഷങ്ങള് നിശ്ശബ്ദമായി കടന്നുപോയതിന് ശേഷം 2026 ജൂണ് 17-നാണ് ഷിജുവിനെ തേടി ആ വലിയ പ്രഹരമെത്തിയത്. തളിപ്പറമ്പ് താലൂക്ക് ഓഫീസില് നിന്നും റവന്യൂ റിക്കവറി ഡിമാന്ഡ് നോട്ടീസ് ഷിജുവിന്റെ കൈകളിലെത്തി. കോടതി വിധിച്ച തുകയും പലിശയും ചെലവുകളും ഉള്പ്പെടെ ആകെ 6,36,211 രൂപ ഉടനടി അടയ്ക്കണമെന്നായിരുന്നു നോട്ടീസിലെ നിര്ദ്ദേശം. തനിക്ക് യാതൊരു ബന്ധവുമില്ലാത്തതും വര്ഷങ്ങള്ക്ക് മുന്പ് കൈവിട്ടുപോയതുമായ വാഹനത്തിന്റെ പേരില് ലക്ഷങ്ങളുടെ കടഭാരമുണ്ടായതോടെ ഷിജു നിയമപരമായ വഴികളെ ആശ്രയിച്ചു. അപകടത്തിന് എത്രയോ മുന്പ് തന്നെ വാഹനം തന്റെ കൈവശത്തുനിന്നും നഷ്ടപ്പെട്ടിരുന്നതാണെന്നും, അപകടസമയത്ത് താന് വാഹനത്തിന്റെ ഉടമയോ ഉപയോഗിക്കുന്നയാളോ അല്ലെന്നും ചൂണ്ടിക്കാട്ടി അദ്ദേഹം ഹൈക്കോടതിയെ സമീപിക്കുകയാണുണ്ടായത്. നോട്ടീസ് ലഭിക്കാതെ തനിക്കെതിരെ പുറപ്പെടുവിച്ച ട്രിബ്യൂണല് ഉത്തരവും റവന്യൂ റിക്കവറി നടപടികളും അടിയന്തരമായി റദ്ദാക്കണമെന്നാണ് ഷിജുവിന്റെ പ്രധാന ആവശ്യം.
News Highlights
Shiju P. faces a revenue recovery notice of Rs 6,36,211 years after his financed lorry was seized by Cholamandalam Investment and Finance Company.
The lorry was involved in an accident in November 2020 without valid insurance after the finance company resold it, while the RC book still remained in Shiju’s name.
Kasaragod MACT ordered Shiju to pay compensation as he was the official registered owner, prompting him to approach the Kerala High Court.
