പത്തനംതിട്ട I ഡിസംബർ 9, 2025
ആക്രമിക്കപ്പെട്ട കേസിൽ എട്ടാം പ്രതിയായിരുന്ന ദിലീപിനെ വിചാരണ കോടതി വെറുതെ വിട്ട സംഭവത്തിൽ പ്രതികരണവുമായി യു.ഡി.എഫ് കൺവീനർ അടൂർ പ്രകാശ്. ദിലീപിന് നീതി ലഭ്യമായി എന്നാണ് താൻ കരുതുന്നതെന്ന് അടൂർ പ്രകാശ് പറഞ്ഞു. നടിയെന്ന നിലയിൽ ആ കുട്ടിക്കൊപ്പമാണ് താനെങ്കിലും നീതി എല്ലാവർക്കും കിട്ടേണ്ടതുണ്ട് എന്നും അദ്ദേഹം കൂട്ടിച്ചേർത്തു. തദ്ദേശ തെരഞ്ഞെടുപ്പിൽ വോട്ട് രേഖപ്പെടുത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
കേസ് കെട്ടിച്ചമച്ചതാണോ?
ദിലീപിന് നീതി ലഭിച്ചു എന്നതിൽ തനിക്ക് വ്യക്തിപരമായ അഭിപ്രായമുണ്ടെന്ന് പറഞ്ഞ അടൂർ പ്രകാശ്, “കലാകാരൻ എന്ന നിലയിൽ മാത്രമല്ല, ദിലീപുമായി നേരിട്ട് ബന്ധമുണ്ടായിരുന്ന വ്യക്തി കൂടിയാണ് ഞാൻ. കോടതി നീതി നൽകി. ഉന്നത പോലീസ് ഉദ്യോഗസ്ഥയുടെ നേതൃത്വത്തിൽ പോലീസുകാർ കെട്ടിച്ചമച്ചതാണ് ഈ കേസ് എന്ന് ദിലീപ് തന്നെ മുൻപ് പറഞ്ഞിട്ടുണ്ട്,” എന്നും ചൂണ്ടിക്കാട്ടി.
അപ്പീൽ പോകുന്നതിനെതിരെ വിമർശനം
വിധി ചോദ്യം ചെയ്ത് അപ്പീൽ പോകാനുള്ള സർക്കാർ തീരുമാനത്തെ അദ്ദേഹം രൂക്ഷമായി വിമർശിച്ചു. “സർക്കാരിന് വേറെ ജോലിയില്ലല്ലോ? ആരെ ഉപദ്രവിക്കാൻ കഴിയുമെന്ന് നോക്കിക്കാണുന്ന സർക്കാരാണ് ഇവിടെയുള്ളത്. എന്ത് കേസും കെട്ടിച്ചമച്ച് ഉണ്ടാക്കുന്ന സർക്കാരാണിത്,” അടൂർ പ്രകാശ് പരിഹസിച്ചു.
തദ്ദേശ തെരഞ്ഞെടുപ്പ്: ശബരിമല വിഷയം അനുകൂലമാകും
തദ്ദേശ തെരഞ്ഞെടുപ്പിൽ യു.ഡി.എഫ് മുന്നണിക്ക് 101 ശതമാനം വിജയ പ്രതീക്ഷയുണ്ടെന്ന് അദ്ദേഹം വ്യക്തമാക്കി. അടൂർ മുനിസിപ്പാലിറ്റി യു.ഡി.എഫ് ഭരിക്കും. ജനങ്ങൾക്കിടയിൽ ചർച്ചയാകുന്ന പ്രധാന വിഷയം ശബരിമലയിലെ സ്വർണ്ണക്കൊള്ളയാണ്. ഈ വിഷയം യു.ഡി.എഫിന് അനുകൂലമാകുമെന്നും തെരഞ്ഞെടുപ്പിൽ യു.ഡി.എഫ് നല്ല ഭൂരിപക്ഷത്തിൽ വിജയിക്കുമെന്നും അദ്ദേഹം കൂട്ടിച്ചേർത്തു.
Highlight
Adoor Prakash on Dileep acquittal: Justice served; Government appeal shows they have no other work
