കണ്ണൂർ | 26, ഡിസംബർ | 2025
കാരായി ചന്ദ്രശേഖരൻ തലശ്ശേരി നഗരസഭ ചെയർപേഴ്സണായി തെരഞ്ഞെടുക്കപ്പെട്ടു. 53 അംഗ കൗൺസിലിൽ 32 പിന്തുണയോടെയാണ് കാരായി ചന്ദ്രശേഖരൻ വിജയിച്ചത്. ചിള്ളക്കര ഡിവിഷനിൽ നിന്ന് 440 വോട്ടിന്റെ ഭൂരിപക്ഷത്തിൽ തെരഞ്ഞെടുക്കപ്പെട്ട കാരായി ചന്ദ്രശേഖരൻ ഫസൽ വധക്കേസിലെ എട്ടാം പ്രതിയാണ്. സംസ്ഥാനത്തുടനീളം വിവിധ നഗരസഭകളിൽ ചെയർപേഴ്സൺമാരെ തെരഞ്ഞെടുത്ത ദിവസമാണിത്.
പയ്യന്നൂർ നഗരസഭാ ചെയർപേഴ്സണായി സിപിഐഎമ്മിന്റെ യുവനേതാവ് സരിൻ ശശി തെരഞ്ഞെടുക്കപ്പെട്ടു. 44 അംഗ കൗൺസിലിൽ 35 വോട്ട് നേടിയാണ് സരിൻ ശശി വിജയിച്ചത്. എന്നാൽ സിപിഐഎം മുൻ ബ്രാഞ്ച് സെക്രട്ടറിയും വിമതനുമായ സി വൈശാഖ് ചെയർപേഴ്സൺ തെരഞ്ഞെടുപ്പിൽ വോട്ട് ചെയ്തില്ല.
കൽപ്പറ്റ നഗരസഭാ ചെയർപേഴ്സണായി സിപിഐഎമ്മിലെ പി വിശ്വനാഥൻ തെരഞ്ഞെടുക്കപ്പെട്ടു. എടഗുനി ഡിവിഷനിൽ നിന്നുള്ള പി വിശ്വനാഥൻ ആദിവാസി ക്ഷേമസമിതി ജില്ലാ പ്രസിഡന്റും സിപിഐഎം കൽപ്പറ്റ് ഏരിയാ കമ്മിറ്റി അംഗവുമാണ്.
പാലാ, പത്തനംതിട്ട, ഒറ്റപ്പാലം
പാലാ നഗരസഭയിൽ ദിയ പുള്ളക്കക്കണ്ടം ചെയർപേഴ്സണായി തെരഞ്ഞെടുക്കപ്പെട്ടു. ദിയയ്ക്ക് 14 പേരുടെ പിന്തുണ ലഭിച്ചപ്പോൾ ഇടതുപക്ഷത്തിന്റെ ബെറ്റി ഷാജുവിനെ 12 പേർ പിന്തുണച്ചു. ഒറ്റപ്പാലം നഗരസഭാ ചെയർപേഴ്സണായി എം ജയസുധ തെരഞ്ഞെടുക്കപ്പെട്ടു. പത്തനംതിട്ട നഗരസഭയിൽ യുഡിഎഫിലെ സിന്ധു അനിൽ ചെയർപേഴ്സണായി തെരഞ്ഞെടുക്കപ്പെട്ടു.
വർക്കല, അടൂർ, കട്ടപ്പന
വർക്കല നഗരസഭയിൽ യുഡിഎഫ് വിമതന്റെ പിന്തുണയോടെ എൽഡിഎഫിന്റെ ഗീത ഹേമചന്ദ്രൻ ചെയർപേഴ്സണായി തെരഞ്ഞെടുക്കപ്പെട്ടു. അടൂർ നഗരസഭാ ചെയർപേഴ്സണായി യുഡിഎഫിലെ റീനാ സാമുവേൽ വിജയിച്ചു. കട്ടപ്പനയിൽ ജോയി വെട്ടിക്കുഴി നഗരസഭാ ചെയർപേഴ്സണായി തെരഞ്ഞെടുക്കപ്പെട്ടു.
തൊടുപുഴ, മാനന്തവാടി, ഈരാറ്റുപേട്ട
തൊടുപുഴയിൽ മുസ്ലിംലീഗിലെ സാബിറ ജലീലാണ് നഗരസഭാ ചെയർപേഴ്സൺ. മാനന്തവാടി നഗരസഭാ ചെയർപേഴ്സണായി കോൺഗ്രസിന്റെ ജോക്കബ് സെബാസ്റ്റ്യൻ തെരഞ്ഞെടുക്കപ്പെട്ടു. ഈരാറ്റുപേട്ടയിൽ മുസ്ലിം ലീഗിന്റെ വി പി നാസർ നഗരസഭാ ചെയർപേഴ്സണായി തെരഞ്ഞെടുക്കപ്പെട്ടു.
പട്ടാമ്പി, തിരുല്ല, കോതമംഗലം
പട്ടാമ്പിയിൽ യുഡിഎഫിന്റെ ടി പി ഷാജി നഗരസഭാ ചെയർപേഴ്സണായി തെരഞ്ഞെടുക്കപ്പെട്ടു. തിരുല്ലയിൽ കേരള കോൺഗ്രസ് ജോസഫ് വിഭാഗത്തിന്റെ എസ് ലേഖയാണ് നഗരസഭാ ചെയർപേഴ്സൺ. കോതമംഗലത്ത് കോൺഗ്രസിന്റെ ഭാനുമതി രാജു ചെയർപേഴ്സണായി തെരഞ്ഞെടുക്കപ്പെട്ടു.
പാലക്കാട്, അങ്കമാലി
പാലക്കാട് മുൻസിപ്പാലിറ്റിയിൽ ബിജെപിയുടെ പി സ്മിതേഷ് നഗരസഭാ ചെയർപേഴ്സണായി തെരഞ്ഞെടുക്കപ്പെട്ടു. സ്വതന്ത്ര അംഗങ്ങളുടെ പിന്തുണയോടെ കോൺഗ്രസിലെ റീത്താ പോൾ അങ്കമാലി നഗരസഭാ ചെയർപേഴ്സണായി തെരഞ്ഞെടുക്കപ്പെട്ടു. 31 അംഗ നഗരസഭയിൽ റീത്താ പോളിന് 16 പേരുടെ പിന്തുണയും എൽഡിഎഫിലെ ഗ്രേസിക്ക് 13 പേരുടെ പിന്തുണയും ലഭിച്ചു. രണ്ട് എൻഡിഎ അംഗങ്ങൾ വോട്ടെടുപ്പിൽ നിന്ന് വിട്ടുനിന്നു.
Content Highlights: Karayi Chandrasekharan elected Thalassery Municipality Chairperson, eighth accused in Fazal murder case, CPM rebel abstains in Payyannur, Diya Pullakkakandam elected Pala chairperson, municipality chairpersons elected across Kerala including Palakkad, Angamaly, Kothamangalam, Thodupuzha, Mananthavady, Eerattupetta, Pattambi, Thiruvalla, Adoor, Varkala, Kalpetta
