തിരുവനന്തപുരം | ഡിസംബർ 31, 2025
തിരുവനന്തപുരം: കഴക്കൂട്ടത്ത് നാല് വയസ്സുകാരനായ ഗിൽദാറിനെ മരിച്ച നിലയിൽ കണ്ടെത്തിയ സംഭവം ക്രൂരമായ കൊലപാതകമാണെന്ന് തെളിഞ്ഞു. സംഭവത്തിൽ കുട്ടിയുടെ അമ്മയുടെ സുഹൃത്തായ മഹാരാഷ്ട്ര സ്വദേശി തൻബീർ ആലത്തെ (24) പോലീസ് അറസ്റ്റ് ചെയ്തു. അമ്മയുമായുള്ള തർക്കത്തെത്തുടർന്നുണ്ടായ വൈരാഗ്യമാണ് പിഞ്ചുകുഞ്ഞിന്റെ കൊലപാതകത്തിൽ കലാശിച്ചതെന്ന് പോലീസ് അറിയിച്ചു. ഇന്നലെ രാത്രി കഴക്കൂട്ടം റെയിൽവേ സ്റ്റേഷനിൽ നിന്നാണ് ഇയാളെ ഷാഡോ പോലീസ് പിടികൂടിയത്.
കൊലപ്പെടുത്തിയത് ടവ്വൽ ഉപയോഗിച്ച്
മണിക്കൂറുകൾ നീണ്ട ചോദ്യം ചെയ്യലിനൊടുവിലാണ് തൻബീർ കുറ്റം സമ്മതിച്ചത്. ബംഗാൾ സ്വദേശിയായ മുന്നി ബീഗവും തൻബീറും തമ്മിൽ നിരന്തരം തർക്കങ്ങൾ നിലനിന്നിരുന്നു. ഡിസംബർ 28-ന് നടന്ന വഴക്കിനിടെ മുന്നിയോടുള്ള പ്രതികാരം തീർക്കാൻ തൻബീർ മുറിയിലുണ്ടായിരുന്ന ടവ്വൽ ഉപയോഗിച്ച് കുട്ടിയുടെ കഴുത്ത് മുറുക്കുകയായിരുന്നു. കഴുത്തിലെ എല്ല് പൊട്ടിയാണ് മരണം സംഭവിച്ചതെന്ന് പോസ്റ്റ്മോർട്ടം റിപ്പോർട്ടിൽ വ്യക്തമായിരുന്നു. കുട്ടി അവശനിലയിലായപ്പോൾ ആശുപത്രിയിൽ കൊണ്ടുപോകാൻ അമ്മ ശ്രമിച്ചെങ്കിലും പ്രതി അത് തടഞ്ഞതായും മൊഴിയുണ്ട്.
ഡോക്ടറുടെ ഇടപെടൽ നിർണ്ണായകമായി
ഭക്ഷണം കൊടുത്ത് ഉറക്കിയ കുട്ടി വൈകുന്നേരമായിട്ടും എഴുന്നേൽക്കുന്നില്ലെന്ന് പറഞ്ഞാണ് മുന്നി ബീഗം കുഞ്ഞിനെ ആശുപത്രിയിൽ എത്തിച്ചത്. എന്നാൽ പരിശോധനയ്ക്കിടെ കുട്ടിയുടെ കഴുത്തിൽ പാടുകൾ കണ്ട ഡോക്ടർക്ക് സംശയം തോന്നുകയും ഉടൻ പോലീസിനെ വിവരമറിയിക്കുകയുമായിരുന്നു. തുടർന്ന് പോലീസ് നടത്തിയ വിശദമായ അന്വേഷണത്തിലാണ് കൊലപാതക വിവരം പുറത്തുവന്നത്.
അമ്മയ്ക്ക് പങ്കില്ലെന്ന് പ്രാഥമിക നിഗമനം
കൊലപാതകത്തിൽ കുട്ടിയുടെ അമ്മയ്ക്ക് നിലവിൽ പങ്കുള്ളതായി തെളിവുകളില്ലെന്ന് പോലീസ് പറഞ്ഞു. പ്രതിയെ ഇന്ന് കോടതിയിൽ ഹാജരാക്കും. കൊലപാതകം നടന്ന മുറിയിൽ പ്രതിയെ എത്തിച്ച് തെളിവെടുപ്പ് നടത്തും. നിലവിൽ മെഡിക്കൽ കോളേജ് മോർച്ചറിയിൽ സൂക്ഷിച്ചിരിക്കുന്ന മൃതദേഹം ബന്ധുക്കൾ എത്തിയ ശേഷം വിട്ടുനൽകും.
Content Highlight: Police arrested Tanbeer Alam, the friend of a migrant woman, for the murder of her four-year-old son, Gildar, in Kazhakkoottam. The post-mortem confirmed the cause of death as strangulation with a towel, resulting in a fractured neck bone. The accused confessed that he killed the child due to his enmity with the mother.
