റിപ്പോർട്ട്: അഡ്വ. ഏലിയാസ് പൊയ്ക്കാട്ടിൽ (ലീഗൽ അഡൈ്വസർ, മംഗളം ഓൺലൈൻ)
കൊച്ചി | 21, മാർച്ച് | 2026
സംസ്ഥാനത്ത് വേനൽച്ചൂട് കഠിനമാകുന്ന സാഹചര്യത്തിൽ അഭിഭാഷകരുടെ വസ്ത്രധാരണത്തിൽ ഇളവ് അനുവദിച്ച് കേരള ഹൈക്കോടതി ഉത്തരവിറക്കി. കേരള ഹൈക്കോടതി അഡ്വക്കേറ്റ്സ് അസോസിയേഷൻ നൽകിയ അപേക്ഷ പരിഗണിച്ചാണ് ചീഫ് ജസ്റ്റിസിന്റെ നിർദ്ദേശപ്രകാരം രജിസ്ട്രാർ ജനറൽ പുതിയ നോട്ടീസ് പുറപ്പെടുവിച്ചത്.
അസാധാരണമായ താപനില ഉയരുന്ന സാഹചര്യത്തിൽ കറുത്ത കോട്ടും ഗൗണും ധരിച്ച് കോടതിയിൽ ഹാജരാകുന്നതിലെ ബുദ്ധിമുട്ട് കണക്കിലെടുത്താണ് ഈ തീരുമാനം. ഉത്തരവ് പ്രകാരം താഴെ പറയുന്ന ഇളവുകളാണ് അനുവദിച്ചിട്ടുള്ളത്:
ജില്ലാ കോടതികളിൽ: ജില്ലാ ജുഡീഷ്യറിക്ക് കീഴിലുള്ള കോടതികളിൽ ഹാജരാകുന്ന അഭിഭാഷകർക്ക് കറുത്ത കോട്ടും ഗൗണും ധരിക്കുന്നത് ഐച്ഛികമായിരിക്കും (Optional). ഈ കോടതികളിൽ വെളുത്ത ഷർട്ടും ബാൻഡും (Band) ധരിക്കേണ്ടതാണ്.
ഹൈക്കോടതിയിൽ: ഹൈക്കോടതിയിൽ ഹാജരാകുന്ന അഭിഭാഷകർക്ക് ഗൗൺ ധരിക്കുന്നത് നിർബന്ധമല്ല.
ഈ മാസം 17-ന് പുറത്തിറങ്ങിയ ഉത്തരവ് പ്രകാരമുള്ള ഇളവുകൾ 2026 മെയ് 31 വരെ നിലവിലുണ്ടാകും. അഭിഭാഷക സമൂഹത്തിന്റെ ദീർഘനാളത്തെ ആവശ്യത്തിനാണ് ഇപ്പോൾ ഹൈക്കോടതി പച്ചക്കൊടി കാട്ടിയിരിക്കുന്നത്. സംസ്ഥാനത്തെ വിവിധ കോടതികളിൽ ജോലി ചെയ്യുന്ന ആയിരക്കണക്കിന് അഭിഭാഷകർക്ക് ആശ്വാസകരമായ തീരുമാനമാണിത്.
Content Highlights
Kerala High Court relaxes the dress code for advocates due to extreme summer heat.
Wearing of black coats and gowns is made optional for lawyers in District Courts.
High Court advocates are exempted from the mandatory wearing of gowns until May 31.
The decision was made by the Chief Justice following a representation from the Kerala High Court Advocates’ Association.
Legal Insight by Adv. Elias Poykkattil, Legal Advisor, Mangalam Online.
