തിരുവനന്തപുരം | ജനുവരി 3, 2026
തിരുവനന്തപുരം: മൂന്ന് പതിറ്റാണ്ട് നീണ്ട വിവാദമായ തൊണ്ടിമുതൽ തിരിമറി കേസിൽ മുൻ മന്ത്രിയും എം.എൽ.എയുമായ ആന്റണി രാജു കുറ്റക്കാരനാണെന്ന് കോടതി. നെടുമങ്ങാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയാണ് വിധി പുറപ്പെടുവിച്ചത്. കേസിലെ ഒന്നാം പ്രതിയും കോടതി ക്ലർക്കുമായിരുന്ന ജോസും കുറ്റക്കാരനാണെന്ന് കോടതി കണ്ടെത്തി. ഇതോടെ ജനപ്രാതിനിധ്യ നിയമപ്രകാരം ആന്റണി രാജുവിന്റെ നിയമസഭാ അംഗത്വം റദ്ദാകും.
അടിവസ്ത്രം വെട്ടി മുറിച്ചു; വഴിതിരിച്ചുവിട്ടത് മയക്കുമരുന്ന് കേസ്
1990-ൽ തിരുവനന്തപുരം വിമാനത്താവളത്തിൽ 61.5 ഗ്രാം ഹാഷിഷുമായി ഓസ്ട്രേലിയൻ പൗരൻ ആൻഡ്രൂ സാൽവദോർ പിടിയിലായതാണ് കേസിന്റെ ആധാരം. അന്ന് പ്രതിയുടെ ജൂനിയർ അഭിഭാഷകനായിരുന്ന ആന്റണി രാജു, കോടതിയിലെ തൊണ്ടി സെക്ഷൻ ക്ലർക്കിനെ സ്വാധീനിച്ച് ലഹരിമരുന്ന് കടത്താൻ ഉപയോഗിച്ച അടിവസ്ത്രം കൈക്കലാക്കി വെട്ടി ചെറുതാക്കിയെന്നാണ് കുറ്റം. അടിവസ്ത്രം പ്രതിക്ക് പാകമാകില്ലെന്ന് കാട്ടി കോടതിയെ തെറ്റിദ്ധരിപ്പിക്കുകയും വിദേശിയെ കുറ്റവിമുക്തനാക്കുകയും ചെയ്തു. എന്നാൽ പിന്നീട് ഇന്റർപോൾ നടത്തിയ അന്വേഷണത്തിലാണ് ഈ തട്ടിപ്പ് പുറത്തുവന്നത്.
നിലനിൽക്കുന്ന വകുപ്പുകൾ
ആന്റണി രാജുവിനെതിരെ ഗൂഢാലോചന (120 B), തെളിവ് നശിപ്പിക്കൽ (201), കള്ളത്തെളിവുണ്ടാക്കൽ (193), സർക്കാർ ഉദ്യോഗസ്ഥന്റെ വിശ്വാസവഞ്ചന (409), പൊതുവായ ഉദ്ദേശ്യത്തോടെയുള്ള കുറ്റകൃത്യം (34) എന്നീ വകുപ്പുകൾ നിലനിൽക്കുമെന്ന് കോടതി വ്യക്തമാക്കി. ഇതിൽ 409-ാം വകുപ്പ് പ്രകാരം രണ്ട് വർഷത്തിൽ കൂടുതൽ ശിക്ഷ ലഭിച്ചാൽ ആന്റണി രാജുവിന് നിയമസഭാ അംഗത്വം നഷ്ടപ്പെടും. കൂടാതെ ഹൈക്കോടതി വിധി തടയാത്ത പക്ഷം വരാനിരിക്കുന്ന നിയമസഭാ തിരഞ്ഞെടുപ്പിൽ മത്സരിക്കാനും അദ്ദേഹത്തിന് കഴിയില്ല.
കേസിന്റെ നാൾവഴി
1990: ഓസ്ട്രേലിയൻ പൗരൻ അറസ്റ്റിലാകുന്നു. സെഷൻസ് കോടതി ശിക്ഷിച്ചെങ്കിലും ഹൈക്കോടതി വെറുതെ വിട്ടു.
1996: അടിവസ്ത്രം മാറ്റി കുറ്റവിമുക്തനായ കാര്യം വിദേശി വെളിപ്പെടുത്തിയതോടെ ഇന്റർപോൾ ഇടപെടുന്നു.
2006: ആന്റണി രാജുവിനെ പ്രതിയാക്കി കുറ്റപത്രം സമർപ്പിച്ചു.
2024: പുനരന്വേഷണം നേരിടണമെന്ന് സുപ്രീം കോടതി ഉത്തരവിട്ടു.
2026 ജനുവരി 3: നെടുമങ്ങാട് മജിസ്ട്രേറ്റ് കോടതി കുറ്റക്കാരനാണെന്ന് വിധിച്ചു.
തിരഞ്ഞെടുപ്പ് പടിവാതിൽക്കൽ നിൽക്കെ പുറത്തുവന്ന ഈ വിധി ആന്റണി രാജുവിനും ഇടതുമുന്നണിക്കും വലിയ രാഷ്ട്രീയ പ്രഹരമാണ് നൽകിയിരിക്കുന്നത്.
Content Highlight The Nedumangad Judicial First Class Magistrate Court found former Kerala Minister and MLA Antony Raju guilty in the 1990 evidence tampering case. The court confirmed that Raju conspired to alter a drug case evidence (underwear) to save an Australian national. This verdict leads to the disqualification of his MLA post and potentially bars him from contesting upcoming elections.
