കൊച്ചി | 15, ജനുവരി | 2026
മലയാളികളുടെ പ്രിയ അവതാരകയും നടിയുമായ അശ്വതി ശ്രീകാന്ത് പങ്കുവെച്ച ഹൃദയസ്പർശിയായ കുറിപ്പാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. 18 വർഷങ്ങൾക്ക് മുൻപ് വിറ്റ തന്റെ പഴയ വീട്ടിലേക്ക് വർഷങ്ങൾക്കിപ്പുറം വീണ്ടും എത്തിയ അനുഭവം പങ്കുവെക്കുകയായിരുന്നു താരം. പഴയ ഓർമ്മകൾക്ക് മുന്നിൽ കണ്ണ് നിറഞ്ഞു പോയ നിമിഷങ്ങളെ കുറിച്ചാണ് അശ്വതി വാചാലയായത്.
ഒരിക്കൽ എന്റേതായിരുന്നു എന്ന് അവകാശപ്പെടാൻ കഴിയാത്ത വിധം അപരിചിതമായി മാറിയ ഒരിടത്ത് നിൽക്കുമ്പോഴുള്ള വികാരമാണ് താരം പങ്കുവെച്ചത്. പണ്ട് ലില്ലിപുട്ടിലെത്തിയ ഗള്ളിവറുടെ കഥ വായിച്ചിരുന്ന അതേ പടിക്കെട്ടിൽ ഇന്ന് താൻ ഗള്ളിവറോളം വളർന്നു നിൽക്കുന്നുവെന്ന് അശ്വതി കുറിച്ചു.
അശ്വതിയുടെ കുറിപ്പിലെ വരികൾ ഇങ്ങനെ
”ഒരിക്കൽ നിങ്ങളുടേതായിരുന്ന ഒരിടത്തേക്ക് വർഷങ്ങൾക്കിപ്പുറം കയറി ചെന്നിട്ടുണ്ടോ? എന്നെ ഓർമ്മയില്ലേ എന്ന് ചോദിക്കാൻ പോലുമാവാത്ത വണ്ണം അപരിചിതമായിക്കഴിഞ്ഞ ഒരിടത്തിങ്ങനെ കണ്ണ് നിറഞ്ഞ് നിന്നിട്ടുണ്ടോ? ഒരിക്കൽ എന്റേതായിരുന്ന വലിയൊരു ലോകം ഒരു കുഞ്ഞു ലില്ലിപുട്ടായി പരിണമിച്ചിരിക്കുന്നു. വെളുത്ത ലില്ലി ചെടികളും കനകാംബരവും പടർന്നു പൂത്ത മുറ്റത്തിന്റെ ഇറമ്പുകൾ, എന്റെ മുച്ചക്ര സൈക്കിൾ ചവിട്ടിയെത്താൻ ബദ്ധപ്പെട്ട അതിരുകൾ, ആകാശം കൊമ്പിലുയർത്തി നിന്ന കശുമാവുകൾ – എല്ലാം ഒറ്റ രാത്രിയിൽ ചുരുങ്ങിപ്പോയത് പോലെ. വിറ്റു പോയിട്ടും വിട്ടു പോകാത്ത ചിലതില്ലേ…അങ്ങനെയൊന്നാണിത്!”
തന്റെ പഴയകാല സൈക്കിൾ യാത്രകളും കശുമാവിൻ ചുവട്ടിലെ കളികളും എല്ലാം മാഞ്ഞു പോയെങ്കിലും മനസ്സിന്റെ ഉള്ളിൽ ആ വീട് ഇന്നും പ്രിയപ്പെട്ടതായി തന്നെ നിലനിൽക്കുന്നുവെന്ന് അശ്വതി പറയുന്നു. താരത്തിന്റെ പോസ്റ്റിന് താഴെ നിരവധി ആരാധകരാണ് സ്വന്തം വീടുകളെ കുറിച്ചുള്ള ഗൃഹാതുരമായ ഓർമ്മകൾ പങ്കുവെച്ചുകൊണ്ട് എത്തുന്നത്.
Content Highlights
Actress and anchor Aswathy Sreekanth shares an emotional post about visiting her childhood home after 18 years. Her nostalgic words about the house they sold years ago have touched many hearts on social media.
