പെരുമ്പാവൂർ | 26, ജനുവരി | 2026
പെരുമ്പാവൂർ: പെരുമ്പാവൂരിലെ അതിഥി തൊഴിലാളികൾക്കിടയിൽ പടരുന്ന അനിയന്ത്രിതമായ മയക്കുമരുന്ന് മാഫിയയെ തുടച്ചുനീക്കാൻ ശക്തമായ കർമ്മപദ്ധതികളുമായി എൽദോസ് കുന്നപ്പിള്ളി എംഎൽഎ. വെങ്ങോല – വാഴക്കുളം പഞ്ചായത്തുകളുടെ അതിർത്തിയായ ഭായ് കോളനിയിൽ ലഹരി ഉപയോഗവും സാമൂഹ്യവിരുദ്ധ പ്രവർത്തനങ്ങളും രൂക്ഷമായ സാഹചര്യത്തിൽ ജനപ്രതിനിധികൾക്കൊപ്പം എംഎൽഎ നേരിട്ടെത്തി സ്ഥിതിഗതികൾ വിലയിരുത്തി.
പ്രദേശത്തെ ക്രമസമാധാനനില തകർക്കുന്ന വിധത്തിലുള്ള ലഹരി ഉപയോഗവും അനാശാസ്യ പ്രവർത്തനങ്ങളും പ്രദേശവാസികളുടെ സമാധാനജീവിതത്തിന് വലിയ ഭീഷണിയായ പശ്ചാത്തലത്തിലാണ് എംഎൽഎയുടെ നേതൃത്വത്തിലുള്ള സംഘം കോളനി സന്ദർശിച്ചത്. പെരുമ്പാവൂരിൽ മയക്കുമരുന്ന് വ്യാപനം തടയാൻ കൂടുതൽ പോലീസ് സേനയെ വിന്യസിക്കണമെന്നും വിവിധ ഇടങ്ങളിൽ പോലീസ് എയ്ഡ് പോസ്റ്റുകൾ സ്ഥാപിക്കണമെന്നും ആവശ്യപ്പെട്ട് എംഎൽഎ നിയമസഭയിൽ സബ്മിഷൻ ഉന്നയിച്ചു കഴിഞ്ഞു.
ജനകീയ പ്രതിരോധത്തിന് തുടക്കം…
ഭായ് കോളനിയിലെ പ്രശ്നങ്ങൾക്ക് പുറമെ പെരുമ്പാവൂർ മുൻസിപ്പാലിറ്റിയിലെ ബസ് സ്റ്റാൻഡുകൾ, ബിവറേജസ് പരിസരങ്ങൾ എന്നിവിടങ്ങളും ലഹരി മാഫിയയുടെ പിടിയിലാണ്. ഇവരെ തുരത്താൻ പോലീസ്-എക്സൈസ് സേനകളുടെയും വ്യാപാരികളുടെയും റെസിഡന്റ്സ് അസോസിയേഷനുകളുടെയും പിന്തുണയോടെ ജനകീയ പ്രതിരോധം തീർക്കാനാണ് തീരുമാനം. ഇതിന്റെ മുന്നോടിയായി അടുത്തയാഴ്ച വിവിധ വകുപ്പുകളുടെ അടിയന്തര യോഗം വിളിക്കുമെന്ന് എംഎൽഎ അറിയിച്ചു.
സന്ദർശന വേളയിൽ ഗ്രാമപഞ്ചായത്ത് പ്രസിഡന്റുമാരായ ഷമിത ഷെരീഫ്, ശാരദ കെ, വൈസ് പ്രസിഡന്റുമാരായ വി.എച്ച്. മുഹമ്മദ്, ഷെമീർ തുങ്കലിൽ, ജില്ലാ പഞ്ചായത്ത് മെമ്പർമാരായ പി.എ. മുക്താർ, സുമയ്യ ടി.എസ്, ബ്ലോക്ക് പഞ്ചായത്ത് മെമ്പർ അഡ്വ. ഫർഹത്ത് സുഹൈൽ, പഞ്ചായത്ത് മെമ്പർ സെറീന ബഷീർ, കണ്ടന്തറ മുസ്ലിം ജമാഅത്ത് ചീഫ് ഡോ. ജുനൈദ് ജൗഹരി അൽ അസ്ഹരി തുടങ്ങിയവർ പങ്കെടുത്തു.
Content Highlights
- MLA Eldhose Kunnappilly visits ‘Bhai Colony’ to address the severe drug menace and antisocial activities among guest workers.
- The MLA raises a submission in the Legislative Assembly for increased police deployment and aid posts in Perumbavoor.
- Plans for a unified action involving Police, Excise, Merchants, and Residents’ Associations to cleanse public spaces like bus stands and beverages outlets.
- An inter-departmental meeting is scheduled for next week to formalize a massive public action plan.
