ന്യൂഡൽഹി | 31, ഡിസംബർ | 2025
ജപ്പാനെ മറികടന്ന് ലോകത്തെ നാലാമത്തെ വലിയ സമ്പദ്വ്യവസ്ഥയായി ഇന്ത്യ മാറിയെന്ന് കേന്ദ്രസർക്കാർ അറിയിച്ചു. 4.18 ട്രില്യൺ ഡോളർ വിലമതിക്കുന്ന ജിഡിപി നേട്ടത്തെ അടിസ്ഥാനമാക്കിയാണ് ഈ വളർച്ച രേഖപ്പെടുത്തിയിരിക്കുന്നത്. 2030-ഓടെ ജർമനിയെ മറികടന്ന് ലോകത്തെ മൂന്നാമത്തെ വലിയ സമ്പദ്വ്യവസ്ഥയായി ഇന്ത്യ മാറുമെന്നും കേന്ദ്രം വ്യക്തമാക്കി.
2025-ലെ പരിഷ്കാരങ്ങളുടെ ഹ്രസ്വചിത്രം നൽകുന്ന സർക്കാർ പത്രക്കുറിപ്പിലാണ് ഇക്കാര്യം വ്യക്തമാക്കിയിരിക്കുന്നത്. “4.18 ട്രില്യൺ ഡോളർ ജിഡിപിയുമായി ഇന്ത്യ ജപ്പാനെ മറികടന്ന് ലോകത്തെ നാലാമത്തെ സമ്പദ്വ്യവസ്ഥയായി. 2030-ഓടെ 7.3 ട്രില്യൺ ഡോളർ ജിഡിപി ഉൽപാദനത്തോടെ അടുത്ത 2.5 മുതൽ മൂന്ന് വർഷത്തിനുള്ളിൽ ജർമനിയെ മൂന്നാം സ്ഥാനത്തുനിന്ന് മാറ്റാനുള്ള തയ്യാറെടുപ്പിലാണ്,” പത്രക്കുറിപ്പിൽ പറയുന്നു.
ലോകത്തെ ഏറ്റവും വേഗത്തിൽ വളരുന്ന സമ്പദ്വ്യവസ്ഥകളിലൊന്നാണ് ഇന്ത്യയെന്നും തൊഴിലില്ലായ്മ കുറയുകയും കയറ്റുമതി വർധിക്കുകയും ചെയ്യുന്നുവെന്നും സർക്കാർ അറിയിച്ചു. നിലവിൽ അമേരിക്കയാണ് ലോകത്തെ ഏറ്റവും വലിയ സമ്പദ്വ്യവസ്ഥ. രണ്ടാം സ്ഥാനത്താണ് ചൈന.
സാമ്പത്തിക വളർച്ചയുടെ നിരവധി സൂചകങ്ങൾ ഇന്ത്യയുടെ പുരോഗതി സൂചിപ്പിക്കുന്നുവെന്നും കേന്ദ്രം വ്യക്തമാക്കി. സാമ്പത്തിക പരിഷ്കാരങ്ങളും വികസന പദ്ധതികളും ഈ വളർച്ചയ്ക്ക് പ്രധാന കാരണങ്ങളാണെന്നാണ് സർക്കാർ നിലപാട്.
ആഗോള സാമ്പത്തിക വേദികളിൽ ഇന്ത്യയുടെ സ്ഥാനം ശക്തിപ്പെടുത്തുന്നതിനുള്ള നടപടികൾ തുടരുകയാണെന്നും കേന്ദ്രം അറിയിച്ചു.
Content Highlights
India becomes world’s fourth-largest economy with $4.18 trillion GDP
Surpasses Japan in global economic rankings
Expected to overtake Germany by 2030 with $7.3 trillion GDP
Government highlights declining unemployment and rising exports
USA remains largest economy, followed by China
