ന്യൂഡൽഹി | 05, ജനുവരി | 2026
എൻഎസ്എസ് നേതൃത്വത്തിനെതിരെ പശ്ചിമബംഗാൾ ഗവർണർ സി വി ആനന്ദബോസ് രംഗത്തെത്തി. മന്നം സമാധിയിൽ പുഷ്പാർച്ചന അനുവദിക്കാത്ത അനുഭവം ഉണ്ടെന്നാണ് ആനന്ദബോസ് പറഞ്ഞത്. ഗവർണറായി ചുമതലയേൽക്കുന്നതിന് മുമ്പായി പുഷ്പാർച്ചനയ്ക്ക് എത്തിയപ്പോഴായിരുന്നു അവഗണന. എല്ലാ നായന്മാർക്കും അവകാശപ്പെട്ടതാണ് മന്നത്ത് സ്മാരകമെന്നും താനൊരു കരയോഗം നായരാണെന്നും ആനന്ദബോസ് വ്യക്തമാക്കി.
പെരുന്നയിൽ താൻ പോകുന്നത് ഗേറ്റ്കീപ്പറെ കാണാനല്ലെന്നും ആനന്ദബോസ് പറഞ്ഞു. ഡൽഹിയിൽ നടന്ന മന്നം അനുസ്മരണ പരിപാടിയിൽ സംസാരിക്കുന്നതിനിടെയായിരുന്നു ആനന്ദബോസ് എൻഎസ്എസ് നേതൃത്വത്തിനെതിരെ ആഞ്ഞടിച്ചത്. തനിക്ക് വളരെ സങ്കടകരമായ ഒരു അനുഭവമുണ്ടായെന്നും അത് തുറന്നുപറയാൻ ആഗ്രഹിക്കുന്നുവെന്നും പറഞ്ഞായിരുന്നു ആനന്ദബോസ് എൻഎസ്എസ് നേതൃത്വത്തിനെതിരെ തിരിഞ്ഞത്.
“ഗ്രാമപ്രദേശത്ത് പഠിച്ചുവളർന്ന ആളാണ് ഞാൻ. മലയാളം മീഡിയത്തിലാണ് പഠിച്ചത്. ദൈവാനുഗ്രഹം കൊണ്ട് ഐഎഎസ് കിട്ടി. പശ്ചിമബംഗാളിന്റെ ഗവർണറാക്കാൻ ആഗ്രഹിക്കുന്നായി ഒരു ദിവസം പ്രധാനമന്ത്രി വിളിച്ചുപറഞ്ഞു. കരയോഗമാണ് എന്നെ ആ സ്ഥാനത്ത് എത്തിച്ചത്. അത് മനസ്സിൽ വെച്ചുകൊണ്ടാണ് ഗവർണറായി ചുമതലയേൽക്കുന്നതിന് മുമ്പ് മന്നത്താചാര്യന്റെ മുന്നിൽ പുഷ്പാർച്ചന നടത്തണമെന്ന് എൻഎസ്എസ് ജനറൽ സെക്രട്ടറിയെ സമീപിച്ചത്,” ആനന്ദബോസ് പറഞ്ഞു.
“ജനറൽ സെക്രട്ടറി ഡോർ തുറന്ന് സ്വീകരിച്ചു. ചായ സൽക്കാരം നൽകി. കാറിൽ കയറ്റി തിരികെ അയച്ചു. എന്നാൽ പുഷ്പാർച്ചന നടത്തുന്ന കാര്യം മാത്രം പറഞ്ഞില്ല. മന്നം സമാധിയിൽ പുഷ്പാർച്ചന നടത്തുന്നത് നായർ സമുദായ അംഗങ്ങളുടെ അവകാശമല്ലേ,” ആനന്ദബോസ് ചോദിച്ചു.
ഡൽഹിയിൽ മന്നത്തിന്റെ സ്മാരകം നിർമിക്കണമെന്നും അതിനായി തന്റെ ഒരു മാസത്തെ ശമ്പളം സംഭാവന നൽകുമെന്നും ആനന്ദബോസ് കൂട്ടിച്ചേർത്തു.
അതേസമയം ആനന്ദബോസിന്റെ ആരോപണം എൻഎസ്എസ് ജനറൽ സെക്രട്ടറി ജി സുകുമാരൻ നായർ തള്ളി. പുഷ്പാർച്ചന നടത്തണമെന്ന് ആനന്ദബോസ് ആവശ്യപ്പെട്ടിട്ടില്ലെന്നായിരുന്നു സുകുമാരൻ നായരുടെ വിശദീകരണം.
Content Highlights
Governor CV Ananda Bose alleges denied floral tribute at Mannam memorial
Says incident happened before assuming West Bengal Governor post
Claims Mannam memorial is right of all Nair community members
States he is a Karayogam Nair, not visiting as gatekeeper
NSS General Secretary received him but didn’t facilitate tribute
Bose offers one month salary for Mannam memorial in Delhi
NSS General Secretary G Sukumaran Nair denies allegations
Says Ananda Bose never requested floral tribute
Remarks made at Mannam commemoration event in Delhi
Controversy highlights community leadership tensions
