ന്യൂഡൽഹി | ജനുവരി 7, 2026
ന്യൂഡൽഹി: ലോക്സഭാ പ്രതിപക്ഷ നേതാവ് രാഹുൽ ഗാന്ധിയുമായി ബന്ധപ്പെടുത്തി ഉയരുന്ന അഭ്യൂഹങ്ങൾ പൂർണ്ണമായും തള്ളി തെലുങ്ക് നടി പൂനം കൗർ. രാഹുൽ ഗാന്ധിയുമായി തനിക്ക് വ്യക്തിപരമായ യാതൊരു ബന്ധവുമില്ലെന്നും കൈത്തറി വ്യവസായവുമായി ബന്ധപ്പെട്ട കാര്യങ്ങൾ സംസാരിക്കാനാണ് അദ്ദേഹത്തെ കണ്ടതെന്നും പൂനം വ്യക്തമാക്കി. ഒരു യൂട്യൂബ് ചാനലിന് നൽകിയ അഭിമുഖത്തിലാണ് പൂനം കൗർ വിഷയത്തിൽ ആദ്യമായി മറുപടി നൽകിയത്.
വിവാദമായ ചിത്രം
2022-ൽ രാഹുൽ ഗാന്ധി നയിച്ച ഭാരത് ജോഡോ യാത്ര തെലങ്കാനയിലൂടെ കടന്നുപോയപ്പോഴാണ് പൂനം കൗർ യാത്രയുടെ ഭാഗമായത്. ഇതിനിടെ പൂനത്തിന്റെ കൈ പിടിച്ച് രാഹുൽ നടക്കുന്ന ചിത്രം പുറത്തുവന്നിരുന്നു. ഈ ചിത്രം ചിലർ ദുരുദ്ദേശപരമായി വളച്ചൊടിക്കുകയും ഇരുവരും തമ്മിൽ പ്രണയത്തിലാണെന്നും ഉടൻ വിവാഹിതരാകുമെന്നും തരത്തിൽ നിരുത്തരവാദപരമായ കിംവദന്തികൾ പ്രചരിപ്പിക്കുകയുമായിരുന്നു. അന്ന് ബിജെപി നേതാക്കളടക്കം ഈ ചിത്രമുപയോഗിച്ച് രാഹുൽ ഗാന്ധിയെ രാഷ്ട്രീയമായി വേട്ടയാടാൻ ശ്രമിച്ചിരുന്നു.
പൂനം കൗറിന്റെ പ്രതികരണം
“പ്രണയമെന്നും വിവാഹമെന്നുമൊക്കെ ചിലർ പ്രചരിപ്പിച്ചു. അത്തരം അപവാദങ്ങൾ പൂർണ്ണമായും വ്യാജവും അപകീർത്തികരവുമാണ്. കൈത്തറി മേഖലയിലെ പ്രശ്നങ്ങൾ ശ്രദ്ധയിൽപ്പെടുത്താനാണ് ഞാൻ അദ്ദേഹത്തെ കണ്ടത്. അന്ന് ചിലർ നടത്തിയ പ്രചാരണങ്ങൾ തികഞ്ഞ പരിഹാസത്തോടെയാണ് തള്ളിക്കളയുന്നത്,” പൂനം കൗർ പറഞ്ഞു.
രാഹുൽ ഗാന്ധിയോടുള്ള ബഹുമാനവും മേഖലയിലെ പ്രശ്നങ്ങളോടുള്ള അദ്ദേഹത്തിന്റെ അനുഭാവവുമാണ് അന്ന് തന്നെ അവിടേക്ക് എത്തിച്ചതെന്നും അവർ കൂട്ടിച്ചേർത്തു. അനാവശ്യമായ ഇത്തരം കിംവദന്തികൾ വ്യക്തിപരമായ അന്തസ്സിനെ ബാധിക്കുന്നതാണെന്നും താരം വ്യക്തമാക്കി.
Content Highlight Telugu actress Poonam Kaur has dismissed long-standing rumours linking her to Congress leader Rahul Gandhi. Clarifying a viral photo from the 2022 Bharat Jodo Yatra where Rahul was seen holding her hand, she stated that the meeting was strictly professional to discuss the handloom industry. She termed the marriage and link-up rumours as “baseless and defamatory.”
