ന്യൂഡൽഹി | 23, ജനുവരി | 2026
ന്യൂഡൽഹി: വരാനിരിക്കുന്ന നിയമസഭാ തിരഞ്ഞെടുപ്പിൽ കേരളത്തിലെ സ്ഥാനാർത്ഥി നിർണ്ണയവുമായി ബന്ധപ്പെട്ട് കോൺഗ്രസ് ഹൈക്കമാൻഡ് നിർണ്ണായക തീരുമാനങ്ങൾ എടുത്തു. മുസ്ലിം ലീഗുമായി സീറ്റുകൾ വെച്ചുമാറാൻ ധാരണയായതോടെ കളമശ്ശേരി, കൊച്ചി മണ്ഡലങ്ങൾ കോൺഗ്രസ് ഏറ്റെടുക്കും. ഇതിന് പകരമായി ഗുരുവായൂർ, പട്ടാമ്പി സീറ്റുകൾ ലീഗിന് വിട്ടുകൊടുക്കും. കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ വസതിയിൽ രാഹുൽ ഗാന്ധിയുടെയും പ്രിയങ്ക ഗാന്ധിയുടെയും സാന്നിധ്യത്തിൽ നടന്ന ചർച്ചയിലാണ് ഈ ധാരണയുണ്ടായത്.
നിർണ്ണായകമായ മറ്റൊരു തീരുമാനം: തൃപ്പൂണിത്തുറ എം.എൽ.എ കെ. ബാബു ഒഴികെയുള്ള കോൺഗ്രസിന്റെ നിലവിലെ എല്ലാ സിറ്റിംഗ് എം.എൽ.എമാരെയും വരാനിരിക്കുന്ന തിരഞ്ഞെടുപ്പിൽ വീണ്ടും മത്സരിപ്പിക്കാൻ ഹൈക്കമാൻഡ് പച്ചക്കൊടി കാട്ടി.
ഈ തീരുമാനത്തോടെ പെരുമ്പാവൂർ മണ്ഡലത്തിൽ എൽദോസ് കുന്നപ്പിള്ളി തന്നെ യുഡിഎഫ് സ്ഥാനാർത്ഥിയാകുമെന്ന് ഉറപ്പായി. വ്യക്തിപരമായ വിവാദങ്ങളും കോടതി നടപടികളും ഒരുവശത്ത് ചർച്ചയാകുന്നുണ്ടെങ്കിലും, പെരുമ്പാവൂരിലെ വിജയസാധ്യതയും മണ്ഡലത്തിൽ അദ്ദേഹം ഉണ്ടാക്കിയെടുത്ത വേരോട്ടവും എൽദോസിന് അനുകൂലമായി. പരീക്ഷണങ്ങൾക്കിടയില്ലാതെ മണ്ഡലം നിലനിർത്താൻ സിറ്റിംഗ് എം.എൽ.എയെ തന്നെ കളത്തിലിറക്കുന്നതാണ് ഉചിതമെന്ന് എഐസിസി വിലയിരുത്തി.
സീറ്റ് വെച്ചുമാറ്റ ധാരണ പ്രകാരം കളമശ്ശേരി കോൺഗ്രസിന് ലഭിക്കുന്നതോടെ എറണാകുളം ഡിസിസി പ്രസിഡന്റ് മുഹമ്മദ് ഷിയാസ് അവിടെ സ്ഥാനാർത്ഥിയായേക്കും. എന്നാൽ പാലക്കാട്, തൃപ്പൂണിത്തുറ സീറ്റുകളുടെ കാര്യത്തിൽ കൂടുതൽ ചർച്ചകൾ ആവശ്യമാണെന്ന് നേതൃത്വം വ്യക്തമാക്കി. കെ. ബാബു മത്സരരംഗത്തുണ്ടാകില്ലെന്ന് ഏകദേശ ധാരണയായ സാഹചര്യത്തിൽ തൃപ്പൂണിത്തുറയിൽ പുതിയ മുഖത്തെ കണ്ടെത്താനാണ് കോൺഗ്രസ് ശ്രമം.
Content Highlights
Congress High Command decides to field all sitting MLAs in Kerala for the 2026 polls, except for Thrippunithura MLA K. Babu.
Swap agreement with Muslim League finalized for Guruvayur, Pattambi, Kalamassery, and Kochi seats.
Eldose Kunnappilly’s candidacy for Perumbavoor is likely to be confirmed, prioritizing winnability over controversies.
Mohammed Shiyas emerges as a strong contender for the newly swapped Kalamassery seat.
High-level meeting in Delhi attended by Mallikarjun Kharge, Rahul Gandhi, and Priyanka Gandhi.
