കൊച്ചി | ഡിസംബർ 31, 2025
കൊച്ചി: സേവ് ബോക്സ് ആപ്പ് നിക്ഷേപ തട്ടിപ്പ് കേസുമായി ബന്ധപ്പെട്ട് നടൻ ജയസൂര്യയ്ക്ക് എൻഫോഴ്സ്മെന്റ് ഡയറക്ടറേറ്റ് വീണ്ടും സമൻസ് അയച്ചു. ജനുവരി ഏഴിന് ചോദ്യം ചെയ്യലിനായി ഹാജരാകാനാണ് നിർദ്ദേശം നൽകിയിരിക്കുന്നത്. കുറ്റകൃത്യത്തിലൂടെ സമ്പാദിച്ച പണം നടന് ലഭിച്ചിട്ടുണ്ടെന്ന നിഗമനത്തിലാണ് ഇ.ഡി ഈ നടപടി സ്വീകരിച്ചിരിക്കുന്നത്.
അന്വേഷണം കൂടുതൽ വ്യാപിപ്പിക്കുന്നു
കേസിലെ മുഖ്യപ്രതി സ്വാതിഖ് റഹീമുമായി ജയസൂര്യയ്ക്ക് ബ്രാൻഡ് അംബാസഡർ ബന്ധത്തിന് പുറമെ മറ്റ് സാമ്പത്തിക ഇടപാടുകൾ ഉണ്ടോയെന്ന് ഇ.ഡി പരിശോധിക്കുന്നുണ്ട്. നേരത്തെ നൽകിയ മൊഴിയിൽ സ്വാതിഖുമായി ബ്രാൻഡ് അംബാസഡർ ബന്ധം മാത്രമാണുള്ളതെന്നായിരുന്നു ജയസൂര്യയുടെ വാദം. എന്നാൽ കൂടുതൽ അന്വേഷണത്തിന് ശേഷം നടന് ലഭിച്ച തുക കണ്ടുകെട്ടാനുള്ള നീക്കത്തിലാണ് ഉദ്യോഗസ്ഥർ. നേരത്തെ ഇതേ കേസിൽ ജയസൂര്യയെയും ഭാര്യ സരിതയെയും കൊച്ചിയിൽ വെച്ച് ഇ.ഡി ചോദ്യം ചെയ്തിരുന്നു.
എന്താണ് സേവ് ബോക്സ് തട്ടിപ്പ്?
നിക്ഷേപ തട്ടിപ്പ്: മാസം 25 ലക്ഷം രൂപ വരെ ലാഭം വാഗ്ദാനം ചെയ്ത് നൂറിലധികം പേരിൽ നിന്ന് ലക്ഷക്കണക്കിന് രൂപ നിക്ഷേപമായി സ്വീകരിച്ചു. എന്നാൽ ആർക്കും ലാഭവിഹിതമോ നിക്ഷേപിച്ച പണമോ തിരികെ ലഭിച്ചില്ല.
ഓൺലൈൻ ലേലം: കുറഞ്ഞ വിലയിൽ ഇലക്ട്രോണിക്സ് ഉപകരണങ്ങൾ സ്വന്തമാക്കാമെന്ന് വാഗ്ദാനം നൽകി ‘സേവ് ബോക്സ്’ എന്ന മൊബൈൽ ആപ്പ് വഴി ലേലം നടത്തി. ലേലത്തിൽ പങ്കെടുക്കാൻ പണം നൽകി വെർച്വൽ കോയിനുകൾ വാങ്ങണമായിരുന്നു.
പ്രതിയുടെ അറസ്റ്റ്: 2023 ജനുവരിയിൽ തൃശ്ശൂർ ഈസ്റ്റ് പോലീസാണ് സ്ഥാപന ഉടമ സ്വാതിഖ് റഹീമിനെ അറസ്റ്റ് ചെയ്തത്. ഫ്രാഞ്ചൈസി നൽകാമെന്ന് പറഞ്ഞ് പണം തട്ടിയെന്ന പരാതിയിലായിരുന്നു നടപടി.
താരങ്ങളുമായുള്ള ബന്ധം: സിനിമാ താരങ്ങളെ പങ്കെടുപ്പിച്ച് വർണ്ണാഭമായ ചടങ്ങുകൾ നടത്തിയാണ് സ്വാതിഖ് നിക്ഷേപകരെ ആകർഷിച്ചിരുന്നത്. ചടങ്ങിൽ പങ്കെടുത്ത താരങ്ങൾക്ക് പഴയ ഐഫോണുകൾ പുതിയ പെട്ടിയിലാക്കി നൽകി കബളിപ്പിച്ചതായും ആരോപണമുണ്ടായിരുന്നു.
Content Highlight: The Enforcement Directorate has again summoned actor Jayasurya in the Save Box app investment fraud case. He has been asked to appear for questioning on January 7, following suspicions regarding financial transactions with the main accused, Swathiq Raheem.
