Thiruvananthapuram | December 5, 2025
ബാലസംഗക്കേസിൽ കോൺഗ്രസ് പാർട്ടി പുറത്താക്കിയ എംഎൽഎ രാഹുൽ മാങ്കൂട്ടത്തിലിനെതിരെ എസ്എഫ്ഐ നേതാവ് പിഎം ആർഷോ പരിഹാസപോസ്റ്റുമായി രംഗത്തെത്തി.
‘കാട്ടരുവിക്കരികിലിരുന്ന് അട്ട കടിച്ച മുറിവിൽ അമർത്തി ചൊറിഞ്ഞയാൾ ഉരുവിട്ടുകൊണ്ടേയിരുന്നു.. എന്റെ ഹിക്ക ഇതറിഞ്ഞാലുണ്ടല്ലോ’ എന്നാണ് പിഎം ആർഷോയുടെ ഫേസ്ബുക്ക് പോസ്റ്റിലെ വാക്കുകൾ.
ബലാത്സംഗക്കേസിൽ കോടതി ജാമ്യം നിഷേധിച്ചതിനെത്തുടർന്നാണ് രാഹുലിനെ പാർട്ടിയിൽനിന്ന് പുറത്താക്കിയതായി കോൺഗ്രസ് ഔദ്യോഗികമായി അറിയിച്ചത്. നിലവിൽ സസ്പെൻഷനിലായിരുന്ന രാഹുൽ മാങ്കൂട്ടത്തിലിനെതിരെ ഉയർന്ന പരാതികളുടെയും രജിസ്റ്റർ ചെയ്ത കേസുകളുടെയും അടിസ്ഥാനത്തിലാണ് പ്രാഥമിക അംഗത്വത്തിൽനിന്ന് പുറത്താക്കിയതെന്ന് കെപിസിസി പ്രസിഡന്റ് സണ്ണി ജോസഫ് എംഎൽഎ വ്യക്തമാക്കി.
എംഎൽഎ സ്ഥാനം രാജിവെക്കുന്നതാണ് നല്ലതെന്ന് കെപിസിസി പ്രസിഡന്റ് സണ്ണി ജോസഫ് അഭിപ്രായപ്പെട്ടു. എഐസിസിയുടെ അനുമതിയോടെയാണ് തീരുമാനമെടുത്തതെന്നും അദ്ദേഹം കൂട്ടിച്ചേർത്തു. രാജിവെക്കണമോ എന്നത് രാഹുലിന്റെ തീരുമാനമാണെന്നും സണ്ണി ജോസഫ് വ്യക്തമാക്കി.
പുറത്താക്കൽ തീരുമാനം കൂട്ടായി എടുത്തതാണെന്നും തിരഞ്ഞെടുപ്പിൽ ഇത് തിരിച്ചടിയാകില്ലെന്നും സണ്ണി ജോസഫ് പറഞ്ഞു. ആക്ഷേപം ഉയർന്നപ്പോൾതന്നെ സസ്പെൻഡ് ചെയ്തതായും നിയമം നിയമത്തിന്റെ വഴിക്ക് പോകട്ടെയെന്നും രാഹുൽ പാർട്ടിക്ക് ക്ഷീണമുണ്ടാക്കിയെന്നും അദ്ദേഹം വ്യക്തമാക്കി.
രാഹുൽ മാങ്കൂട്ടത്തിൽ ചാപ്റ്റർ ക്ലോസ്ഡ് എന്ന് മുതിർന്ന കോൺഗ്രസ് നേതാവ് കെ മുരളീധരൻ പ്രതികരിച്ചു. ധാർമികതയുണ്ടെങ്കിൽ രാഹുൽ എംഎൽഎ സ്ഥാനം രാജിവെക്കണമെന്ന് താൻ പറയില്ലെന്നും കാരണം അത്തരത്തിലുള്ള പണിയല്ല രാഹുൾ ചെയ്തതെന്നും കെ മുരളീധരൻ വ്യക്തമാക്കി. രാഹുലിനുവേണ്ടി കോൺഗ്രസ് മുന്നിട്ടിറങ്ങില്ലെന്നും അദ്ദേഹം കൂട്ടിച്ചേർത്തു.
Highlights
– SFI leader PM Arsho makes satirical post against expelled Congress MLA Rahul Mankootathil
– KPCC President Sunny Joseph says Rahul should resign from MLA post
– Congress expels Rahul after court denies bail in case
– Senior leader K Muraleedharan says chapter closed on Rahul Mankootathil
– Decision taken with AICC approval, says state leadership
