മുംബൈ | 01, ജനുവരി | 2026
നാളുകൾ ഏറെയായി ഇന്ത്യൻ ടീമിൽ നിന്ന് വിട്ടുനിൽക്കുന്ന പേസ് ബോളർ മുഹമ്മദ് ഷമിയെ തിരിച്ചുവിളിക്കാൻ ബിസിസിഐ ഒരുങ്ങുകയാണ്. കഴിഞ്ഞ വർഷം നടന്ന ചാമ്പ്യൻസ് ട്രോഫിക്ക് ശേഷം ഇന്ത്യൻ കുപ്പായം അണിയാൻ താരത്തിന് സാധിച്ചിട്ടില്ല. മോശമായ പ്രകടനവും യുവതാരങ്ങളുടെ വരവും കാരണമാണ് ഷമിയെ ടീമിൽ എടുക്കാത്തതെന്നായിരുന്നു ബിസിസിഐ നൽകിയ വിശദീകരണം.
ഇപ്പോൾ മുഹമ്മദ് ഷമിയുടെ കാര്യത്തിൽ വമ്പൻ നീക്കത്തിനൊരുങ്ങുകയാണ് ബിസിസിഐ. ഷമിയെ വീണ്ടും ഇന്ത്യൻ ഏകദിന ടീമിലേക്ക് തിരിച്ചുവിളിച്ചേക്കുമെന്ന റിപ്പോർട്ടുകളാണ് പുറത്തുവരുന്നത്. ന്യൂസിലാന്ഡിന് എതിരായുള്ള പരമ്പരയിൽ ടീമിൽ താരം ഇടം കണ്ടെത്തിയേക്കും.
2027-ലെ ഏകദിന ലോകകപ്പ് അടുക്കുന്ന സാഹചര്യത്തിലാണ് ബിസിസിഐയുടെ പുതിയ നീക്കമെന്നാണ് റിപ്പോർട്ടുകൾ. സമീപകാലത്ത് ആഭ്യന്തര ക്രിക്കറ്റിൽ ഷമി മികച്ച പ്രകടനം കാഴ്ചവെക്കുന്നുണ്ട്. ഇത് പരിഗണിച്ച് 2027-ലെ ഏകദിന ലോകകപ്പിലേക്ക് ഷമിയെ പരിഗണിക്കുന്ന കാര്യം സെലക്ടർമാർ ആലോചിക്കുന്നുണ്ടെന്നാണ് ബിസിസിഐ വൃത്തങ്ങളെ ഉദ്ധരിച്ച് എൻഡിടിവി റിപ്പോർട്ട് ചെയ്യുന്നത്.
“മുഹമ്മദ് ഷമിയെക്കുറിച്ച് ഇപ്പോൾ നിരന്തരം ചർച്ചകൾ നടക്കുന്നുണ്ട്. അദ്ദേഹം ഒരിക്കലും പ്ലാനുകളിൽ നിന്ന് പുറത്തല്ല. താരത്തിന്റെ ഫിറ്റ്നസ് മാത്രമാണ് ആശങ്ക. ഷമിയെപ്പോലൊരു മികച്ച ബൗളർക്ക് ഏത് സമയത്തും വിക്കറ്റുകൾ വീഴ്ത്താൻ സാധിക്കും. സെലക്ടർമാരുടെ റഡാറിൽ നിന്ന് ഷമി പുറത്താണെന്ന വാർത്തകൾ തെറ്റാണ്,” ബിസിസിഐ വൃത്തങ്ങൾ വ്യക്തമാക്കി.
“ന്യൂസിലാന്ഡിനെതിരായുള്ള ഏകദിന പരമ്പരയിൽ ഷമി കളിക്കാൻ സാധ്യതയുണ്ട്. അദ്ദേഹത്തിന്റെ അനുഭവസമ്പത്തും കഴിവും വെച്ചുനോക്കിയാൽ ഷമിയെ ടീമിലെടുത്താൽ അത്ഭുതപ്പെടാനില്ല. 2027 ലോകകപ്പിൽ പോലും താരം കളിച്ചേക്കാം,” ബിസിസിഐ വൃത്തങ്ങളെ ഉദ്ധരിച്ച് എൻഡിടിവി റിപ്പോർട്ട് ചെയ്തു.
ഷമിയുടെ തിരിച്ചുവരവ് ഇന്ത്യൻ ബൗളിംഗിന് വലിയ കരുത്തേകുമെന്നാണ് ക്രിക്കറ്റ് വിദഗ്ധരുടെ വിലയിരുത്തൽ. പരിചയസമ്പന്നനായ ഷമിയുടെ സാന്നിധ്യം യുവതാരങ്ങൾക്ക് വലിയ പ്രചോദനമാകുമെന്നും വിശകലനങ്ങളുണ്ട്.
Content Highlights
BCCI planning Mohammed Shami’s comeback to Indian ODI team
Shami may feature in series against New Zealand
Selectors considering Shami for 2027 ODI World Cup
Pacer showing good form in domestic cricket
Fitness only concern, never out of selection plans
Experience and ability make him valuable asset
