കൊല്ലം | 19, ജനുവരി | 2026.
ശബരിമല സ്വർണ്ണക്കൊള്ള കേസിൽ അറസ്റ്റിലായ മുൻ തിരുവിതാംകൂർ ദേവസ്വം ബോർഡ് പ്രസിഡന്റ് എൻ. വാസുവിനെ കൊല്ലം വിജിലൻസ് കോടതി വീണ്ടും റിമാൻഡ് ചെയ്തു. 14 ദിവസത്തേക്കാണ് റിമാൻഡ് കാലാവധി നീട്ടിയത്. ആദ്യഘട്ട റിമാൻഡ് കാലാവധി അവസാനിച്ചതിനെത്തുടർന്ന് ഇന്ന് കോടതിയിൽ ഹാജരാക്കിയ വാസുവിന്റെ ജാമ്യാപേക്ഷ കോടതി തള്ളുകയായിരുന്നു. ഇതോടെ ഇയാളെ ജുഡീഷ്യൽ കസ്റ്റഡിയിൽ ജയിലിലേക്ക് മാറ്റി.
കേസിലെ മറ്റ് പ്രതികളായ തന്ത്രിയുടെയും ഉണ്ണികൃഷ്ണൻ പോറ്റിയുടെയും ജാമ്യനീക്കങ്ങളും കോടതിയുടെ പരിഗണനയിലാണ്. സ്വർണ്ണക്കൊള്ളയിൽ തനിക്ക് പങ്കില്ലെന്നും പ്രത്യേക അന്വേഷണ സംഘം (SIT) കോടതിയിൽ സമർപ്പിച്ച റിമാൻഡ് റിപ്പോർട്ടിലെ വാദങ്ങൾ അതിവിചിത്രവും വസ്തുതാവിരുദ്ധവുമാണെന്നും തന്ത്രി തന്റെ ജാമ്യാപേക്ഷയിൽ ചൂണ്ടിക്കാട്ടിയിട്ടുണ്ട്. തന്ത്രിയുടെ ജാമ്യാപേക്ഷ കോടതി ഇന്ന് പരിഗണിക്കും.
അതേസമയം, കേസിലെ മറ്റൊരു പ്രധാന പ്രതിയായ ഉണ്ണികൃഷ്ണൻ പോറ്റി സമർപ്പിച്ച ജാമ്യഹർജിയിൽ വിജിലൻസ് കോടതി നാളെ വിധി പറയും. ദ്വാരപാലക ശില്പങ്ങളിലെ സ്വർണ്ണപ്പാളികൾ മോഷ്ടിച്ച കേസിൽ അറസ്റ്റിലായി 90 ദിവസം പിന്നിട്ടത് ചൂണ്ടിക്കാട്ടിയാണ് പോറ്റി ജാമ്യത്തിന് അപേക്ഷിച്ചത്. ഇതിനു മുൻപ് രണ്ടുതവണ പോറ്റി സമർപ്പിച്ച ജാമ്യാപേക്ഷകളും കോടതി തള്ളിയിരുന്നു.
അന്വേഷണത്തിന്റെ ചുരുക്കം…
ശബരിമലയിലെ ദ്വാരപാലക ശില്പങ്ങളിലെ സ്വർണ്ണപ്പാളികൾ കടത്തിയതും പകരം വ്യാജപ്പാളികൾ സ്ഥാപിച്ചതുമാണ് കേസിനാസ്പദമായ സംഭവം. മുൻ ദേവസ്വം ബോർഡ് ഭാരവാഹികളും തന്ത്രിയും ഉൾപ്പെടെയുള്ളവർക്ക് ഗൂഢാലോചനയിൽ പങ്കുണ്ടെന്നാണ് എസ്.ഐ.ടിയുടെ കണ്ടെത്തൽ.
Content Highlights
Former Devaswom President N. Vasu remanded for another 14 days in the Sabarimala gold theft case.
Kollam Vigilance Court rejects Vasu’s bail application, sending him back to judicial custody.
Sabarimala Thantri’s bail plea to be considered today; he denies any involvement in the gold heist.
Court to pronounce verdict tomorrow on the bail plea of Unnikrishnan Potti, who has been in jail for over 90 days.
SIT maintains that high-profile officials and priests were involved in the conspiracy to replace original gold plates with fake ones.
