കൊൽക്കത്ത | 10, ജനുവരി | 2026
ഒരു പരിധിക്കപ്പുറം തന്നെയും സർക്കാരിനെയും സമ്മർദത്തിലാക്കിയാൽ കൽക്കരി കുംഭകോണത്തിൽ കേന്ദ്ര ആഭ്യന്തരമന്ത്രി അമിത് ഷായുടെ പങ്ക് വ്യക്തമാക്കുന്ന പെൻഡ്രൈവ് പുറത്തുവിടുമെന്ന് പശ്ചിമബംഗാൾ മുഖ്യമന്ത്രി മമത ബാനർജി. ഐ-പാക് ഓഫീസിലെ ഇഡി റെയ്ഡിന് പിന്നാലെയായിരുന്നു മമത ബാനർജിയുടെ രൂക്ഷമായ പ്രതികരണം.
അമിത് ഷായുടെ പങ്ക് വ്യക്തമാക്കുന്ന പെൻഡ്രൈവുകൾ തന്റെ കൈവശമുണ്ടെന്നും താൻ ഇരിക്കുന്ന കസേരയോടുള്ള ബഹുമാനം കൊണ്ടാണ് മൗനം പാലിക്കുന്നതെന്നും മമത ബാനർജി പറഞ്ഞു. രാജ്യം ഞെട്ടുന്ന വിവരങ്ങൾ പുറത്തുവരുമെന്നും അവർ മുന്നറിയിപ്പ് നൽകി.
ബംഗാളിലെ നിയമസഭാ തെരഞ്ഞെടുപ്പ് ജയിക്കുക എന്നതാണ് ബിജെപിയുടെ ലക്ഷ്യമെന്നും മമത പറഞ്ഞു. അതിനായി അവർ എന്ത് മാർഗവും ഉപയോഗിക്കുമെന്നും അവർ ആരോപിച്ചു. തൃണമൂൽ കോൺഗ്രസിന്റെ തെരഞ്ഞെടുപ്പ് തന്ത്രങ്ങൾ ചോർത്താനുള്ള ബിജെപിയുടെ നീക്കമാണിതെന്നും മമത ബാനർജി ആരോപിച്ചു. ഇഡി റെയ്ഡിൽ പ്രതിഷേധിച്ച് നടത്തിയ റാലിയിൽ ആൾക്കൂട്ടത്തെ അഭിസംബോധന ചെയ്ത് സംസാരിക്കുകയായിരുന്നു അവർ.
അതേസമയം കള്ളപ്പണം വെളുപ്പിക്കൽ കേസുമായി ബന്ധപ്പെട്ടാണ് റെയ്ഡുകൾ എന്നാണ് ഇഡിയുടെ വാദം. കുറ്റകൃത്യത്തിൽ നിന്നുള്ള വരുമാനം ഐ-പാകിലേക്ക് മാറ്റിയെന്നും ഇഡി പറയുന്നു. മുഖ്യമന്ത്രി ഇടപെട്ട് റെയ്ഡ് തടഞ്ഞുവെന്ന് ആരോപിച്ച് ഇഡി കൊൽക്കത്ത ഹൈക്കോടതിയെ സമീപിച്ചിട്ടുണ്ട്.
മമതക്കെതിരെ ബിജെപിയും രംഗത്തുവന്നിരുന്നു. ഇഡിയുടെ അന്വേഷണം മുഖ്യമന്ത്രി ഇടപെട്ട് തടസപ്പെടുത്തിയെന്നായിരുന്നു ബിജെപി നേതാക്കളുടെ ആരോപണം. ഇഡി റെയ്ഡ് ചെയ്ത രണ്ടു സ്ഥലങ്ങളിലും മുഖ്യമന്ത്രി നേരിട്ടെത്തിയത് സംഘർഷങ്ങൾക്ക് വഴിവെച്ചു. പശ്ചിമ ബംഗാളിൽ ഒന്നും ഒളിച്ചുവെയ്ക്കാനില്ലെങ്കിൽ, ഒരു മുഖ്യമന്ത്രി ഔദ്യോഗിക അന്വേഷണത്തെ തടസ്സപ്പെടുത്തുന്നത് എന്തിനാണെന്നും ബിജെപി നേതാക്കൾ ചോദിച്ചിരുന്നു.
മമത ബാനർജിയുടെ തെരഞ്ഞെടുപ്പ് തന്ത്രങ്ങൾ രൂപപ്പെടുത്തുന്ന സംഘത്തിലെ പ്രധാന അംഗമായ പ്രതീക് ജെയിന്റെ വസതിയിലും സാൾട്ട് ലേക്ക് സെക്ടർ അഞ്ചിലുള്ള ഗോദ്രെജ് വാട്ടർസൈഡ് കെട്ടിടത്തിലെ കമ്പനിയുടെ ഓഫീസിലുമാണ് ഇഡി റെയ്ഡ് നടത്തിയത്.
Content Highlights: Mamata Banerjee claims to have pen drives revealing Amit Shah’s role in coal scam; threatens to release evidence if pressured; ED conducts raid at I-PAC office; BJP accuses CM of obstructing investigation; political confrontation intensifies ahead of assembly elections
