തിരുവനന്തപുരം | 05, ജനുവരി | 2026
വീണ്ടും സൈബർ അധിക്ഷേപം നടത്തിയെന്ന് രാഹുൽ മാങ്കൂട്ടത്തിൽ കേസിലെ അതിജീവിതയുടെ പരാതിയിൽ രാഹുൽ ഈശ്വറിനോട് നേരിട്ട് ഹാജരാകാൻ തിരുവനന്തപുരം സിറ്റി സൈബർ പൊലീസ് നിർദേശിച്ചു. സ്റ്റേഷനിൽ ഇന്ന് നേരിട്ട് ഹാജരാകാനാണ് പൊലീസ് ആവശ്യപ്പെട്ടിരിക്കുന്നത്. കേസിലെ ജാമ്യ വ്യവസ്ഥകൾ രാഹുൽ ലംഘിക്കുന്നുണ്ടോ എന്ന് പൊലീസ് പരിശോധിക്കുകയാണ്.
ജാമ്യ വ്യവസ്ഥകൾ ലംഘിച്ചതായി കണ്ടെത്തിയാൽ കോടതിയെ അറിയിച്ച ശേഷം അറസ്റ്റ് ചെയ്യാനാണ് പൊലീസിന്റെ തീരുമാനം. സൈബർ ഇടങ്ങളിൽ ഒരു തരത്തിലും അതിജീവിതയ്ക്കെതിരായ പരാമർശങ്ങൾ ഉണ്ടാകരുതെന്ന കർശനമായ വ്യവസ്ഥയിലായിരുന്നു രാഹുൽ ഈശ്വറിന് ജാമ്യം അനുവദിച്ചിരുന്നത്.
എന്നാൽ ജാമ്യം ലഭിച്ചതിന് ശേഷം വീണ്ടും സമാന വീഡിയോകൾ സമൂഹ മാധ്യമങ്ങളിൽ പങ്കുവെച്ചതിനെ തുടർന്നാണ് അതിജീവിത രാഹുൽ ഈശ്വറിനെതിരെ പുതിയ പരാതിയുമായി രംഗത്തെത്തിയത്. ഇതിന് പിന്നാലെ തനിക്കെതിരെ വ്യാജ പരാതി നൽകിയെന്ന് ചൂണ്ടിക്കാട്ടി അതിജീവിതയ്ക്കെതിരെ രാഹുൽ ഈശ്വർ പരാതി നൽകിയിരുന്നു.
അതിജീവിതയുടെ ഭർത്താവിന്റെ വെളിപ്പെടുത്തലിനെതിരെയാണ് താൻ വീഡിയോ ചെയ്തതെന്ന് രാഹുൽ ഈശ്വർ പരാതിയിൽ പറഞ്ഞിരുന്നു. വീഡിയോ ചെയ്യരുതെന്ന് ജാമ്യ ഉപാധിയിൽ ഇല്ലെന്നും പരാതിയിൽ വ്യക്തമാക്കിയിരുന്നു. സംഭവത്തിൽ നടപടി സ്വീകരിക്കണമെന്നാണ് രാഹുൽ ഈശ്വറിന്റെ ആവശ്യം.
അതിജീവിതയ്ക്ക് എതിരെ അപകീർത്തികരമായ പരാമർശങ്ങൾ നടത്തിയ രാഹുൽ ഈശ്വറിനെ കഴിഞ്ഞ നവംബർ 30-ന് പൊലീസ് അറസ്റ്റ് ചെയ്തിരുന്നു. ജാമ്യാപേക്ഷയുമായി രാഹുൽ തിരുവനന്തപുരം എസിജെഎം കോടതിയെ സമീപിച്ചെങ്കിലും കോടതി തള്ളിയിരുന്നു. രാഹുൽ അന്വേഷണവുമായി സഹകരിക്കുന്നില്ലെന്ന പ്രോസിക്യൂഷൻ വാദം അംഗീകരിച്ചായിരുന്നു കോടതി നടപടി.
ഇതിന് പിന്നാലെ രാഹുൽ വീണ്ടും പൊലീസ് കസ്റ്റഡിയിലായി. കോടതി ജാമ്യം നിഷേധിച്ചതിൽ പ്രതിഷേധിച്ച് രാഹുൽ ഈശ്വർ ജയിലിൽ നിരാഹാര സമരം നടത്തിയിരുന്നു. അറസ്റ്റിലായി പതിനാറാം ദിവസമാണ് രാഹുലിന് തിരുവനന്തപുരം എസിജെഎം കോടതി ജാമ്യം അനുവദിച്ചത്.
Content Highlights
Survivor files fresh complaint against Rahul Easwar for cyber abuse
Thiruvananthapuram City Cyber Police direct Rahul to appear in person
Police examining if bail conditions violated
Bail granted with strict condition not to make remarks against survivor
Survivor alleges similar videos shared on social media after bail
Rahul Easwar files counter-complaint alleging false case
Earlier arrested on November 30 for defamatory remarks
Spent 16 days in custody before getting bail
Conducted hunger strike in jail protesting bail denial
